विश्वप्रकाश शर्माले प्रधानमन्त्री पाँच वर्ष टिक्ने सुनिश्चित गर्ने नयाँ संवैधानिक प्रावधान सहितको राजनीतिक सहमतिको प्रस्ताव अघि सारेका छन्।
धरानको भानु चोकमा सुनसरी–१ का उम्मेदवार सुजेन्द्र तामाङको ‘प्रतिबद्धता घोषणा सभा’ लाई सम्बोधन गर्दै उनले चुनावअघि नै सरकार, राजनीतिक दल, बौद्धिक क्षेत्र र जेनजी सहितको बृहत् सम्मेलन आयोजना गर्न आह्वान गरे।
सो सम्मेलनमार्फत वर्तमान संविधान र समग्र शासकीय पद्धतिमा दर्जनभन्दा बढी सुधारका बुँदामा सहमति गरेर सार्वजनिक प्रस्ताव ल्याउनुपर्ने उनको धारणा थियो।
उनले नेपाली कांग्रेस बहुमत ल्याउने लक्ष्यका साथ अघि बढेको उल्लेख गर्दै स्थिर सरकारका लागि चुनावपूर्व नै राष्ट्रिय सहमति आवश्यक रहेको बताए।
'प्रधानमन्त्री पाँच वर्ष टिक्न र टिकाउन नयाँ सोच सहितको संवैधानिक प्रावधान राख्न जरूरी छ,' उनले भने।
नेपालको पछिल्लो ७५ वर्षको राजनीतिक इतिहासमा कुनै पनि प्रधानमन्त्री लगातार पाँच वर्ष टिक्न नसकेको उल्लेख गर्दै शर्माले अब प्रणालीमै सुधार आवश्यक भएको जिकिर गरे।
उनले प्रत्यक्ष सिट र लोकप्रिय मतका आधारमा पहिलो हुने दलका प्रधानमन्त्रीले पूरा पाँच वर्ष शासन गर्ने व्यवस्था गर्नुपर्ने प्रस्ताव राखे। बहुमत नपुगे ‘विनर्स टेक अल’ को नीति अनुसार आवश्यक संख्या सुनिश्चित गर्ने र दोस्रो तथा तेस्रो दल सरकारमा नजाने, बरू पाँच वर्षसम्म प्रतिपक्षमै बस्ने अवधारणामा राष्ट्रिय सहमति गर्नुपर्ने उनको भनाइ थियो।
सभामुख चयनपछि बस्ने संसदको पहिलो बैठकबाट सो सहमति संविधानमा अंकित गर्न सकिने उनले सुझाव दिए।
-1746009348.jpg)
