नेपाली कांग्रेसका सभापति गगन थापाले दुई कार्यकाल मात्रै प्रधानमन्त्री र मुख्यमन्त्री बन्न पाउने व्यवस्था लागू गरिने बताएका छन्।
बिहीबार राष्ट्रिय सभा गृहमा प्रतिज्ञापत्रबारे प्रश्नोत्तर कार्यक्रमलाई सम्बोधन गर्दै सभापति थापाले प्रधानमन्त्री र मुख्यमन्त्री दुई पटकभन्दा बढी बन्न नपाइने गरी नीति कार्यान्वयन गरिने बताएका हुन्।
संघमा १६ र प्रदेशमा ६ वटामात्रै मन्त्रालय राख्न पाउने व्यवस्था गरिने उनले बताए।
'कसैले पनि प्रदेशमा गठबन्धन मिलाउन पर्यो त्यसकारण मन्त्रालयको संख्या बढाउनु पर्यो भन्न कसैले पाउँदैन,' उनले भने।
नियुक्तिमा दल होइन,अब्बल
सभापति थापाले नियुक्तिमा अब दल होइन अब्बल नीति कार्यान्वयन गरिने पनि बताए।
उनले कांग्रेसले संवैधानिक नियुक्तिहरूमा भाग नखोज्ने पनि बताए।
'कहिँ पनि अब पाँच वर्षको दौरानमा संवैधानिक आयोगमा बसेर भागबन्डा माग्न गयो। विश्वविद्यालयमा बसेर भागबन्डा माग्न गयो भन्ने कुरा अब सुन्नुपर्ने छैन,' उनले भने।
यी कुराहरूका गर्नका लागि संस्थागत सुधार आवश्यक हुने पनि उनले बताए।
'संस्थागत सुधार कसरी गर्ने भन्ने पनि राखेका छौं,' उनले भने।
५ वर्षभित्र नेपाललाई भ्रष्टाचारमुक्त समाज बनाउने
सभापति थापाले नेपालबाट ५ वर्षभित्र भ्रष्टाचार अन्त्य गरी नागरिकहरूलाई हैरानीबाट मुक्त र सरकारलाई जबाफदेही बनाउने बताएका हुन्।
त्यसका लागि आयोग बनाए २०४८ सालेदेखि सार्वजनिक ओहोदामा बसेका सबैको सम्पती छानबिन गर्ने सभापति थापाले बताए।
'आयोगले सबैको छानबिन गर्छ। कांग्रेसका पनि प्रत्येकको छानबिन हुन्छ। आयोगले गरेको निर्णयलाई कार्यान्वयन गर्ने सन्दर्भमा नेता पनि हेर्दैन, नाता पनि हेर्दैन। यसका सिफारिस सबै कार्यान्वयन गर्छ। किन गर्छ भने नेपाललाई भ्रष्टाचार मुक्त बनाउनका निम्ति सार्वजनिक ओहोदामा बसेर भ्रष्टाचार गरियो भने विषौं वर्षपछाडि भए पनि सजाय हुने रहेछ है भन्ने मान्यता स्थापित गर्नुपर्नेछ,' उनले भने।
सँगै भ्रष्टाचार नियन्त्रणका लागि कानुनहरू पनि बनाउने सभापति थापाले बताए।
'अख्तियारले नीतिगत भ्रष्टाचार हेर्ने कुरालाई ६ महिनाभित्र बनाउने। कन्फ्लिक्ट अफ इन्टेरेस्ट र तोकिएको समयमा काम नगर्नू पनि भ्रष्टाचार हो भन्ने कुरालाई कानुन नै बनाएर लागु गर्ने हो,' उनले भने।
-1771492452.jpg)
-1746009348.jpg)
