राष्ट्रिय स्वतन्त्र पार्टी (रास्वपा)का सभापति रवि लामिछानेले सबै दल मिलेर रास्वपाविरूद्ध लड्न चुनौती दिएका छन्।
बिहीबार कर्णालीको सुर्खेतबाट पार्टीको वाचापत्र सार्वजनिक कार्यक्रममा बोल्दै सभापति लामिछानेले सबै दल मिलेर रास्वपाविरूद्ध लड्न चुनौती दिएका हुन्।
'यदि लोकतन्त्रको पीर छ भने भएभरका सबै दल मिल्नुस्। एउटा दल बनाएर चुनाव लड्नुस्— ‘अल भर्सेस वान। घन्टी भर्सेस अल,' उनले भने।
उनले जनता जागेको बेला लोकतन्त्रमा खतरा छ भनेर 'कचकच' गर्न नमिल्ने बताए।
'शान्तिपूर्ण निर्वाचनको प्रत्याभूति सरकारले दिन्छ। रास्वपा लोकतान्त्रिक विधि मानेर, लोकतन्त्रका मूल्य–मान्यतामा अडिग भएर काम गर्छ। राष्ट्रिय स्वतन्त्र पार्टीसँग डराउनुपर्ने जो छन्, उनीहरू मात्र डराऊन्। जनता डराउनुपर्दैन,' उनले भने।
उनले यसपालिको निर्वाचनलाई रास्वपाले केवल मतदान मात्रै नभई देशको भाग्य र भविष्य बदल्ने दिनका रूपमा हेरेको बताए।
'अब २१ गते अनुमोदन गर्ने हो हामीले। विश्वलाई नेपाल अगाडि बढ्दैछ भनेर देखाउने दिन हो—२१ गते,' उनले भने।
सभापति लामिछानेले पिछडिएको कर्णालीलाई अब पछाडि पार्न नदिनका कर्णालीबाटै वाचापत्र सार्वजनिक गरिएको बताए।
'हामीले भनेका छौं—बाचा जसले गर्ने हो, त्यसले नै पूरा गर्ने हो। बाचा पूरा गर्न सकेन भने त्यसले सजाय भोग्ने हो। त्यसकारण हामी नागरिकसँग करार गरेर आएका छौं, चानचुने कुरा गरेर आएका होइनौं,' उनले भने।
उनले अहिले चुनाव गर्नु हुँदैन भन्ने कुरा पनि कता कता सुनिएको बताए।
'चुनावले निकास दिँदैन भनिएको पनि सुनिन्छ। तर चुनावले निकास दिँदैन भने के ले दिन्छ निकास? लोकतन्त्रको सबैभन्दा ठूलो ताकत भनेकै जनताको ताकत हो। जनताले भोटबाट आफ्नो ताकत देखाउने यो उत्सव, यो निर्वाचनले निकास दिँदैन भने के ले दिन्छ?,' उनले भने।
उनले लोकतन्त्रको खतरा हेलिकप्टर चढेर भागिसकेको बताए।
'अब ल्यान्ड नहोस्। लोकतन्त्रलाई खतरा तब मात्र हुन्छ, जब फेरि त्यो हेलिकप्टर बालुवाटार वा सिंहदरबारमा ल्यान्ड हुन्छ,' उनले भने,'अरू जहाँ ल्यान्ड हुन्छ, होस् —हामीलाई केही भन्नु छैन। तर जनताको भाग्य बदल्ने सिंहदरबारमा नहोस्, यति भए पुग्छ। त्यसैले परिवर्तनको यो आगोलाई, जनताको चेतनालाई कसैले चुनौती नदियोस्।'
त्यसकारण लोकतन्त्रलाई अहिले खतरा नभएको र यसलाई जोगाउन कुनै नेता वा पार्टीले ठेक्का लिनु नपर्ने उनले बताए।
'जनता स्वयंले जोगाउँछन्,' सभापति लामिछानेले भने।
-1746009348.jpg)
