नेपाली कांग्रेसका सभापति गगन थापाले राष्ट्रिय स्वतन्त्र पार्टी (रास्वपा) सभापति विरूद्धको सहकारी ठगी मुद्दाका प्रमाणका विषयमा जबाफ दिएका छन्।
सामाजिक सञ्जालमा उनलाई प्रमाण खै भनेर सोधिएका प्रश्नबारे बिहीबार राष्ट्रिय सभाको प्रश्नोत्तर कार्यक्रममा पनि उठेको थियो।
जबाफमा सभापति थापाले आफूले अदालतका आदेशहरूमा उल्लिखित तथ्यलाई नै प्रमाणका रूपमा प्रस्तुत गरेको बताएका हुन्।
‘यो प्रश्न मलाई कमेन्टमा पनि एकदमै धेरै आउँछ। आज यो प्रश्नलाई लिने कि नलिने भन्ने द्विविधामा थिएँ। तर पछि नागरिकले सोधेको प्रश्नको जबाफ जिम्मेवारीमा भएको व्यक्तिले दिनुपर्छ भन्ने लाग्यो,’ उनले भने।
लामिछाने गृहमन्त्री हुँदा उनी पोखराको सूर्यदर्शन, रूपन्देहीको सुप्रिम लगायतका सहकारीको बचत अपचलनमा मुछिएको घटना सार्वजनिक भएपछि त्यतिखेर प्रतिपक्षमा रहेको नेपाली कांग्रेसले उनीमाथि संसदीय छानविन हुनुपर्ने सवाल उठाएको थियो।
त्यतिबेला थापाले रवि र उनी सञ्चालक रहेको गोर्खा मिडियाले सहकारीको ऋण अपचलन गरेको प्रमाणहरू भएकाले छानबिन समिति बनाउनुपर्ने भनेर बोलेका थिए।
अहिले थापालाई रास्वपाका कार्यकर्ता तथा लामिछानेका प्रशंसकहरूले प्रमाण खै भनेर त्यही विषयमा सोध्ने गरेका हुन्।
यी प्रश्नको जवाफ दिँदै थापाले लामिछाने मुछिएका सहकारी ठगीका मुद्दामा सर्वोच्च अदालत, कास्की, रूपन्देही, चितवन, पर्सा र काठमाडौं जिल्ला अदालतले गरेका आदेश पढेर सुनाए।
‘यी सबै कुरा मैले भनेको होइन अदालतले भनेका हुन्। तपाईंलाई यसबारे जान्ने इच्छा छ भने मैले बताइरहनुपर्दैन कृपया सर्वोच्च अदालको वेबसाइटमा गएर हेर्नुहोला,’ थापाले भने।
-1746009348.jpg)
