नेपाली कांग्रेसका उपसभापति विश्वप्रकाश शर्माले मतदातालाई 'चुपचाप छाप होइन, प्रश्न गरेर बुझेर मात्रै छाप' लगाउन आग्रह गरेका छन्।
पाँचथरको राँके, सोलुखुम्बुको सोताङ र इलामको फिक्कलमा आयोजित सभालाई सम्बोधन गर्दै उनले आवेग र उत्तेजनाभन्दा विवेकपूर्ण निर्णय आवश्यक रहेको बताएका हुन्।
सभामा उनले भने, 'उत्तेजना र आवेगमा कोही उम्मेदवार वा दल हुन सक्छन्, तर देश आवेगले बन्दैन। मतदाताले नै भन्नुपर्छ— ‘चुपचाप यो छाप, त्यो छाप’ को नारा हामी मान्दैनौं। हामी दल र उम्मेदवारलाई प्रश्न गर्छौं, जबाफ चाहन्छौं।'
उनले जेनजी पुस्ताको असन्तुष्टिपछि राजनीतिक दलहरू कति बदलिए भन्ने विषयमा प्रश्न गर्न आग्रह गरे।
'नेपाली समाजका एक–एक असन्तुष्टिको पहिचान गरेर कसले दस्तावेज तयार गर्यो? विषम परिस्थितिमा संयम र समन्वयको भूमिका कसले निर्वाह गर्यो? घोषणा पत्रमा पूरा गर्न सकिने जिम्मेवार सपना छ कि ‘जो होगा देखा जाएगा’ भन्ने अक्षरको भारी मात्र?,' भन्दै उनले मतदातालाई खरो ढंगले मूल्यांकन गर्न आह्वान गरे।
शर्माले पार्टीले मत मागे पनि अन्धाधुन्ध समर्थन नचाहेको स्पष्ट पारे।
'नेपाली कांग्रेस नेपाली मतदाताको मत चाहन्छ, तर मत दिनु अघि मनलाई सोध्नुस्, प्रश्न गर्नुस् भन्ने चाहन्छ,' उनले भने।
तीनै जिल्लामा उम्मेदवारहरूसहित आयोजित सभामा उनले लोकतन्त्रलाई बलियो बनाउन सचेत र प्रश्न गर्ने मतदाता आवश्यक रहेको धारणा व्यक्त गरेका थिए।
-1746009348.jpg)
