नेपाली कांग्रेसकी केन्द्रीय उपसभापति पुष्पा भुसालले आगो लगाउने नभई, युवाको पेटको आगो निभाउने पार्टी बन्न चाहेको बताएकी छिन्।
आइतबार तुलसीपुरको बसपार्कमा आयोजना गरेको बृहत चुनाबी सभालाई सम्बोधन गर्दै उनले कांग्रेस विषेश महाधिवेशनबाट सुध्रिएर आएको हुँदा अब देश पनि सुधार्ने बताइन्।
फागुन २१ गतेको निर्वाचन पछि गगन थापालाई प्रधानमन्त्री बनाउने योजनामा हस्ताक्षर गर्ने व्यक्तिका रूपमा दाङका तीन वटै निर्वाचन क्षेत्रका उम्मेदवारलाई विजयी गराउन उनले आग्रह गरिन्।
लोकतान्त्रिक विचारधारा बोकेको कांग्रेसले जितेमा मात्रै उद्योगी व्यवसायी खुसी हुने, देश शान्तिको मार्गमा अगाडि बढ्ने र अन्तर्राष्ट्रिय लगानीकर्ताहरू नेपालमा आकर्षित हुने उनले विश्वास दाबी गरिन्।
‘कांग्रेसलाई विजय गराए मात्रै मुलुकको आर्थिक विकासका लागि सुरक्षित वातावरण प्राप्त गर्नुहुने छ,’ उनले भनिन्, ‘अब हाम्रो सपना राजनीतिक परिवर्तन होइन। हाम्रो सपना भनेको यो देशको आर्थिक परिवर्तन गर्ने हो।’
लोकतान्त्रिक पद्धति अनुसार संविधान र विधानको परिधि भित्र बाँधेर देश संचालन गर्न कांग्रेसले जित्न जरूरी रहेको उनले तर्क थियो।
उनले कम्युनिष्ट पार्टीहरूले आफूलाई संविधान र कानुन भन्दा माथि गएर यो देशको बाघडोर सम्हाल्न खोजेको तथा जेन्जी पुस्ताको सपनालाई अस्वीकार गरेको दोषारोपन गरिन्।
त्यस्तै नयाँ भनाउँदा पार्टी आन्दोलन वा परिवर्तनबाट नआएको, विचार के हो थाहा नभएको भन्दै कांग्रेस उपसभापति भुसालले घरहरू, भवनहरू, सरकारी कार्यालयहरू ध्वस्त गर्दै रमाउने पार्टीलाई नयाँ पार्टी स्वीकार गर्ने नसकिने बताइन्।
‘नयाँ पार्टीले भन्छ चुपचाप मत दिनुहोस। तर, हामी भन्छौं संवादबाट, वादविवादबाट, चेतावनीबाट, छलफलबाट, चित्त बुझाएर मतबाट मत दिनुहोस्। यो निवेदन गर्न हामी आएका हौं,’ उनले भनिन्।
मुलकलाई भ्रष्टचार मुक्त बनाउँदै पीछडिएको समुदाय, वर्ग र महिलाको देश बनाउन कांग्रेसले संकल्प गरेको उनले बताइन्।
-1746009348.jpg)
