धनुषा क्षेत्र नम्बर १ का राष्ट्रिय स्वतन्त्र पार्टी (रास्वपा) का उम्मेदवार किशोरी साह कमल कालोसूचीमा परेपछि उम्मेदवारी खारेज भएको खुलेको छ।
मंगलबार निर्वाचन आयोगले उनको उम्मेदवारी खारेज गरेको कार्यवाहक प्रमुख निर्वाचन आयुक्त रामप्रसाद भण्डारीले पुष्टि गरे।
आयोगका अनुसार बैंक तथा वित्तीय संस्था सम्बन्धी विषयमा कर्जा सूचना केन्द्रले उनलाई कालोसूचीमा राखेको हो।
उनको कमल निर्माण सेवा प्रालि २०८० माघ २२ गतेदेखि बैंक तथा वित्तीय संस्था सम्बन्धी दायित्व पूरा नगरेको कारण कालोसूचीमा परेको थियो।
बैंकको ऋण नतिरेको, चेक बाउन्स भएको लगायतका मुद्दा लागेपछि सम्बन्धित पक्षलाई कर्जा सूचना केन्द्रले कालोसूचीमा राख्ने गर्छ।
कर्जा सूचना केन्द्रका प्रवक्ता विजय कुँवरलाई हामीले साह किन कालोसूचीमा परेका थिए? भनेर सोधेका छौं। उनले यस विषयमा सम्बन्धित व्यक्ति र सरकारी निकाय बाहेकलाई जानकारी दिन नमिल्ने बताए।
‘वित्तीय संस्थाको ऋण लिएर नतिरेको, चेक बाउन्स गरेको, लगायतका विषयमा मुद्दा लागेका व्यक्तिलाई कालोसूचीमा राखिन्छ। उहाँलाई पनि तीमध्ये एकमा हो, तर कुनमा हो भन्ने सम्बन्धित व्यक्ति र सरकारी निकाय बाहेकलाई खुलाउन मिल्दैन,’ उनले भने।
धनुषा १ का निर्वाचन अधिकृत मनोज बरालले कमलविरूद्ध कालोसूचीमा परेको उजुरी छानबिनका लागि आयोग पठाइएको बताए।
उक्त उजुरीमाथि छानबिनपछि सोमबार बसेको आयोग बैठकले प्रतिनिधि सभा निर्वाचन ऐन २०७४ को दफा १३ को खण्ड (९) अनुसार उम्मेदवार हुन अयोग्य ठहर गरेको हो।
‘राष्ट्रिय स्वतन्त्र पार्टीको तर्फबाट मनोनयन दर्ता गराउनु भएका उम्मेदवार श्री किशोरी साह कमल प्रतिनिधि सभा सदस्य निर्वाचन ऐन, २०७४ को दफा १३ को खण्ड (ज) बमोजिम उम्मेदवार हुन अयोग्य रहेको ठहर गरी निर्वाचन आयोग ऐन, २०७३ को दफा ९ को उपदफा ९५० बमोजिम निजको उम्मेदवारी खारेज गर्ने निर्णय भएको व्यहोरा निर्णयानुसार अनुरोध छ,’ आयोगले निर्णयमा भनेको छ।
प्रतिनिध सभा निर्वाचन ऐन, २०७४ को दफा १३ (९) ले ‘प्रचलित कानून बमोजिम कालोसूचीमा रहेकोमा सो अवधिभर’ उम्मेदवार हुन अयोग्य हुने उल्लेख छ।
२०७४ सालको चुनावमा एमालेबाट धनुषाका प्रदेशसभा सदस्य बनेका उनी २०७९ मा जनमतबाट प्रतिनिधि सभा उम्मेदवार भएका थिए। त्यो बेला भने उनी पराजित भएका थिए। यसपटक रास्वपाबाट उम्मेदवार भएका उनको उम्मेदवारी खारेज भएको हो।
धनुषा(१) मा एमालेबाट रामचन्द्र मण्डल, कांग्रेसबाट रामपलटन साह, नेकपाबाट मातृका प्रसाद यादव, जसपाबाट दीपक कार्की र जनमतबाट ब्रह्मदेव महतो उम्मेदवार छन्।
