दोलखामा मतपत्र लुटिएपछि रोकिएको मतदान सुरू भएको छ।
जिल्लाका अन्य मतदानस्थलमा मतदान धमाधम भइरहे पनि तामाकोशी गाउँपालिका-४ गोलेश्वर मावि मतदानस्थलमा मतपत्र लुटिएपछि रोकिएको थियो।
अपराह्न सबैको सहमति पछि मतदान सुरू गरिएको सहायक प्रमुख जिल्ला अधिकारी औलाखबहादुर आलेले जानकारी दिए।
‘अन्यत्र मतदान धमाधम सकिँदैछ। रोकिएको ठाउँमा मतदान गर्न थालेको छ। मतदान गर्न कम्पाउण्डभित्र पसेपछि बेलुकी ८ बजेसम्म पनि समय लाग्न सक्छ,’ उनले भने।
मतदानस्थलबाट ५४ वटा मतपत्र लुटपाट भएको थियो। हस्ताक्षर नभएको उक्त मतपत्र लुटिएपछि त्यहाँ मतदान रोकिएको थियो। लुटिएको मतपत्रमध्ये ४५ वटा फेला परेका थिए।
त्यसबाहेक फेला नपरेका मतपत्रलाई मान्य नगर्ने गरी सहमति भएको उनले बताए।
यस मतदानस्थलमा कर्मचारीमा समेत हातपात भएको थियो। त्यसक्रममा प्रहरीले हवाइफायर गरेको थियो। निर्वाचन आयोगका अनुसार दिउँसो ३ बजेसम्म ४१.८९ प्रतिशत मतदान भएको थियो। थप विवरण आउन बाँकी छ।
