झापा निर्वाचन क्षेत्र नम्बर ५ मा ६५ प्रतिशत मत खसेको छ।
सर्वाधिक चासो रहेको यो क्षेत्रमा राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह र नेकपा एमालेका अध्यक्ष केपी शर्मा ओलीबीच प्रतिस्पर्धा छ।
यसैबीच बिहीबार बिहान ७ बजेदेखि साँझ ५ बजेसम्ममा झापा-५ मा ६५.११ प्रतिशत मतदान भएको प्रमुख जिल्ला अधिकारी शिवराम गेलालले जानकारी दिए।
उनका अनुसार यहाँ एक लाख ६३ हजार ३७९ मतदाता छन्। त्यसमध्ये एक लाख६ हजार ३७२ मतदान भएको हो।
‘यस क्षेत्रमा उल्लेख्य संख्यामा मतदान भएको छ,’ उनले भने।
उनका अनुसार अहिले विभिन्न मतदानस्थल र केन्द्रबाट मतपेटिका संकलन भई गणनास्थलमा लग्ने काम हुँदैछ।
गणनास्थलमा साढे ८ बजेसम्म पुर्याउन सक्ने प्रमुख जिल्ला अधिकारी गेलालले बताए।
‘साढे ८ बजेतिर बुझ्ने काम भएपछि साढे ९ बजेतिर सबै जना खाना ब्रेक होला। सबै फर्किँदा साढे १० बज्ला,’ उनले भने, ‘अन्दाजमा सर्वदलीय बैठक बसेर सक्दा १२/१ बज्न सक्छ।’
सर्वदलीय बैठकले निर्णय गरे मध्यराति वा भोलि बिहान मतगणना सुरू हुने उनले बताए।
‘सहमति भएमा मध्यराति नै गणना होला, बिहान पनि हुनसक्छ,’ उनले भने।
झापा जिल्लामा पाँच वटा निर्वाचन क्षेत्र छन्।
यी पाँचै वटा निर्वाचन क्षेत्रमा ६४.२४ मत खसेको गेलालले बताए।
झापा-१ मा एक लाख ३१ हजार मध्ये ८३ हजार ८२२ र झापा-२ मा एक लाख ४७ हजार ५२२ मध्ये ९६ हजार २५३ मत खसेको छ।
त्यस्तै, झापा-३ मा एक लाख ४० हजार ८५७ मध्ये ८८ हजार ४४९ मत खसेको छ।
झापा-४ मा एक लााख ३० हजार ७१२ मा ८३ हजार ४६६ मत खसेको प्रमुख जिल्ला अधिकारी गेलालले बताए।
-1772710950.jpg)
