प्रतिनिधिसभा सदस्यका लागि बिहीबार भएको निर्वाचनमा तनहुँबाट ५२ प्रतिशत मतदान भएको मुख्य निर्वाचन अधिकृतको कार्यालयले जनाएको छ।
दुईवटा निर्वाचन क्षेत्र रहेको तनहुँमा २ लाख ५४ हजार ३९७ जना मतदाता छन् जसको आधाभन्दा बढी मतदाताले मतदान गरेको निर्वाचन कार्यालयले जनाएको छ।
तनहुँका मुख्य निर्वाचन अधिकृत विष्णुप्रसाद उपाध्यायका अनुसार अहिले मतपेटिका संकलन भइरहेको छ।
तनहुँको देवघाट गाउँपालिकाको दुर्गम क्षेत्रबाट मतपेटिका आउन समय लाग्ने उपाध्यायले बताए। उनका अनुसार आज राती ११ बजेसम्म मतपेटिका संकलन भए तत्काल सर्वदलीय बैठक बसेर मतगणना थालिनेछ। ११ बजेसम्म पनि मतपेटिका संकलन नभए शुक्रबार बिहानैदेखि मतगणना सुरू गर्ने गरी तयारी गरेको उनले बताए।
'मतपेटिका ११ बजेसम्म संकलन भइसक्यो भने आज रातिदेखि मतगणना सुरू गरिनेछ। नभए भोलि बिहानैबाट मतगणना गर्ने गरी तयारी गरिएको छ,' उपाध्यायले भने।
तनहुँमा ३१० वटा मतदान केन्द्रमा १४४ वटा मतदान स्थल छन्। सबै मतदान स्थलबाट मतपेटिका सदरमुकाम दमौली ल्याएपछि मात्र सर्वदलीय बैठक बस्ने र मतगणना थालिनेछ।
