प्रतिनिधिसभा निर्वाचनको मत परिणाम आउने क्रम जारी छ। शनिबार बिहान ५ बजेसम्म १९ वटा निर्वाचन क्षेत्रको अन्तिम परिणाम आइसकेको छ।
अन्तिम परिणाम घोषणा भइसकेका १९ निर्वाचन क्षेत्रमध्ये १२ वटामा राष्ट्रिय स्वतन्त्र पार्टी (रास्वपा) का उम्मेदवार विजयी भएका छन् भने चार वटामा कांग्रेस, दुई वटामा नेपाली कम्युनिस्ट पार्टी (नेकपा) र एउटामा नेकपा एमालेका उम्मेदवार विजयी भएका छन्।
एमालेको पहिलो जित
नेकपा एमालेले प्रतिनिधिसभा निर्वाचनको जारी मतगणनामा पहिलो जित निकालेको छ।
बाँके निर्वाचन क्षेत्र नम्बर २ मा नेकपा एमालेका मोहम्मद इस्तियाक राई विजयी भएका छन्। आफ्ना निकट प्रतिस्पर्धी राष्ट्रिय स्वतन्त्र पार्टी (रास्वपा) का विवेक कुमार श्रेष्ठलाई ५ हजार ९४६ मतान्तरले हराउँदै उनी विजयी भएका हुन्।
निर्वाचन अधिकृत दीपककुमार दाहालका अनुसार राईले २४ हजार ६२८ मत प्राप्त गरेका छन् भने रास्वपाका श्रेष्ठले १८ हजार ६८२ मत प्राप्त गरेका छन्।
कांग्रेसले जितेका यी ४ क्षेत्र
१) रसुवामा नेपाली कांग्रेसका मोहन आचार्य विजयी भएका छन्।
उनले १० हजार ६५६ मत ल्याएको मुख्य निर्वाचन अधिकृतको कार्यालयले जनाएको छ। उनका निकट प्रतिद्वन्द्वी राष्ट्रिय स्वतन्त्र पार्टी (रास्वपा) का वसन्त भट्टले ५५७१ मत ल्याएका छन्।
यहाँ नेकपा एमाले प्रेमबहादुर तामाङ ४६८१ मतसहित तेस्रो स्थानमा छन्।
२) मनाङमा नेपाली कांग्रेसका उम्मेदवार टेकबहादुर गुरूङ विजयी भएका छन्।
उनले २ हजार ४१५ मत पाएका छन् भने निकट प्रतिस्पर्धी नेकपाकी यशोदा सुवेदी गुरुङले ४५४ मत पाएकी छन्।
३) मुस्ताङमा कांग्रेसका उम्मेदवार योगेश गौचन थकाली निर्वाचित भएका छन्।
उनले ३ हजार ३०७ मत ल्याएका छन्। उनका निकट प्रतिस्पर्धी नेकपा एमालेका उम्मेदवार इन्द्रधारा डाडु विष्टले १ हजार ८०६ मत र रास्वपाका अधितीयचन्द्र थकालीले ७५९ मत ल्याएका छन्।
४) दैलेख-१ मा नेपाली कांग्रेसकी बास्ना थापा विजयी भएकी छन्। निर्वाचन आयोगका अनुसार उनी १२ हजार ३७२ मत ल्याएर निर्वाचित भएकी हुन्।
उनका निकट प्रतिस्पर्धी नेपाली कम्युनिस्ट पार्टी (नेकपा) का रविन्द्रराज शर्माले ११ हजार ७९६ मत प्राप्त गरेका छन्। उनीहरूबीचको मतान्तर ५७६ छ।
नेकपाले जितेका यी २ क्षेत्र
१) रूकुममा नेपाली कम्युनिस्ट पार्टी (नेकपा) का संयोजक पुष्पकमल दाहाल 'प्रचण्ड' विजयी भएका छन्। उनी १० हजार २४० मतसहित विजयी भएका हुन्।
उनका निकट प्रतिस्पर्धी नेकपा एमालेका लिलामणि गौतमले ३ हजार ४६२ ल्याएका छन् भने नेपाली कांग्रेसकी उम्मेदवार कुसुमदेवी थापाले ३ हजार ८१ मत ल्याएकी छन्।
२) कालिकोटमा नेकपाका महेन्द्रबहादुर शाही विजयी भएका छन्। उनी ९८६ मतान्तरले विजयी भएका हुन्।
शाहीले ११ हजार ३३८ मत प्राप्त गरेका छन् भने उनका निकट प्रतिस्पर्धी नेकपा एमालेका नगीन्द्र शाहीले १० हजार ३५२ मत प्राप्त गरेका छन्।
रास्वपाले जितेका यी १२ क्षेत्र
१) काठमाडौं-९ मा राष्ट्रिय स्वतन्त्र पार्टी (रास्वपा) का उपसभापति डिपी अर्याल विजयी भएका छन्।
अर्याल २९ हजार ६३३ मतान्तरले विजयी भएका हुन्। उनले ३५ हजार ९३ मत प्राप्त गरेका छन्। उनका निकट प्रतिद्वन्द्वी नेपाली कांग्रेसका नानुमैया बास्तोलाले ५ हजार ४६० मत प्राप्त गरेकी छन्।
२) काठमाडौं-५ मा राष्ट्रिय स्वतन्त्र पार्टी (रास्वपा) का सस्मित पोखरेल विजयी भएका छन्।
उनले ३० हजार ७३७ मत प्राप्त गरेर जित निकालेका हुन्। निकटतम प्रतिद्वन्द्वी कांग्रेसका प्रदीप पौडेलले ९ हजार १५९ मत प्राप्त गरेका छन्।
३) धनुषा-३ मा राष्ट्रिय स्वतन्त्र पार्टीका प्रवक्ता मनिष झा विजयी भएका छन्।
उनले ४३ हजार ९८८ मत ल्याएर विजयी भएका हुन्। उनका निकट प्रतिद्वन्द्वी नेपाली कांग्रेसका विमलेन्द्र निधिले १६ हजार ३३६ मत ल्याएका छन्।
४) काठमाडौं-१ मा रास्वपा उम्मेदवार रञ्जु दर्शना विजयी भएकी छन्। उनले १५ हजार ४५५ मत प्राप्त गरेकी छन्। उनका निकट प्रतिस्पर्धी नेपाली कांग्रेसका प्रबल थापाले ६ हजार ३६४ मत ल्याएका छन्।
५) काठमाडौं-३ मा उज्यालो नेपाल पार्टीका कुलमान घिसिङलाई हराउँदै रास्वपाका राजुनाथ पाण्डे विजयी भएका छन्। उनी १८ हजार ७५७ मत पाएर विजयी भएका हुन्। कुलमान ११ हजार १७१ मत पाएर दोस्रो स्थानमा छन्।
६) काठमाडौं-६ मा रास्वपाका उम्मेदवार शिशिर खनाल विजयी भएका छन्। उनले २७ हजार ७१९ मत प्राप्त गर्दै विजयी भएका हुन्। उनी यसअघि पनि यही निर्वाचन क्षेत्रबाट विजयी भएका थिए।
उनका निकट प्रतिद्वन्द्वी नेपाली कांग्रेसका कृष्ण बानियाँ क्षेत्रीले ६ हजार ६४७ मत प्राप्त गरे। यहाँ नेकपा एमालेका अमनकुमार मास्केले ४ हजार ३७३ मत पाएका छन्।
७) काठमाडौं-७ मा रास्वपाका गणेश पराजुली विजयी भएका छन्। उनी २७ हजार ८०५ मतसहित विजयी भएका हुन्। उनका निकट प्रतिस्पर्धी नेपाली कांग्रेसका प्रमोदहरि गुरागाईं ३ हजार ९८२ मत ल्याएर दोस्रो स्थानमा छन्।
८) काठमाडौं-८ मा रास्वपाका उम्मेदवार विराजभक्त श्रेष्ठ विजयी भएका छन्। उनले २४ हजार ५९२ मत ल्याएका छन्। यहाँ नेपाली कम्युनिस्ट पार्टी (नेकपा) का उम्मेदवार सुमन सायमिले ३ हजार २१७ मत प्राप्त गरेका छन्।
नेपाली कांग्रेसकी उम्मेदवार सपना राजभण्डारीले २ हजार ८३५ मत ल्याइन् भने नेकपा एमालेका राजेश शाक्यले १ हजार ९०९ र राप्रपाका उम्मेदवार नवीन शाहीले पनि १ हजार ९०९ मत प्राप्त गरेका छन्।
९) काठमाडौं-१० मा रास्वपा उम्मेदवार प्रदीप विष्ट विजयी भएका छन्। निर्वाचन आयोगको तथ्यांक अनुसार विष्टले ३७ हजार ४६९ मत पाएका छन्।
उनले आफ्ना निकट प्रतिस्पर्धी नेपाली कांग्रेसका हिमाल कार्कीलाई २९ हजार ३६९ मतान्तरले पछि पारेका छन्। कार्कीले जम्मा ८ हजार १०० मत पाएका छन्।
यहाँ तेस्रो स्थानमा रहेको नेकपा एमालेका विनोद श्रेष्ठले ४ हजार ८६४ मत प्राप्त गरेका छन्।
कुल ८३ हजार ३०१ मतदाता रहेको काठमाडौं-१० मा यसअघिका तीनवटा निर्वाचन लगातार कांग्रेसका राजेन्द्र केसीले जितेका थिए।
१०) कास्की-३ मा रास्वपाकी बिना गुरूङ निर्वाचित भएकी छन्।
निर्वाचन कार्यालय कास्कीका अनुसार गुरूङ ३७ हजार ७५० मत ल्याएर निर्वाचित भएकी हुन्। उनका निकट प्रतिस्पर्धी नेपाली कांग्रेसका मनोज गुरूङले १२ हजार ७८० मत ल्याएका छन् भने नेकपा एमालेका उम्मेदवार दामोदर पौडेल 'बैरागी' ले ७ हजार ९०६ मत पाएर तेस्रो स्थानमा छन्।
११) मोरङ-४ मा रास्वपाका सन्तोष राजवंशी निर्वाचित भएका छन्। उनले ४० हजार ८३३ मत प्राप्त गरेर विजयी भएका हुन्।
उनका निकट प्रतिस्पर्धी कांग्रेसका गुरूराज घिमिरेले १२ हजार ८१८ मत मात्रै प्राप्त गरेका छन्।
१२) कास्की-२ मा रास्वपा उम्मेदवार उत्तमप्रसाद पौडेल विजयी भएका छन्।
उनी २४ हजार ४१८ मतान्तरका साथ विजयी भएका हुन्। उनले ३१ हजार ९११ मत प्राप्त गरेका छन् भने उनका निकट प्रतिद्वन्द्वी नेकपा एमालेका उम्मेदवार रश्मी आचार्यले ७४९३ मत प्राप्त गरेका छन्।
-1746009348.jpg)
