नेपाली कांग्रेसका नेता शेखर कोइराला मोरङ ६ मा पराजित भएका छन्।
उनले यस क्षेत्रमा विजयी भएकी रास्वपाकी उम्मेदवार रूविना आचार्यलाई बधाई पनि दिएका छन्।
यस्तो छ कोइरालाको भनाइ-
फागुन २१ गतेको आम चुनाव सम्पन्न गरेर देश अब सरकार निर्माणको दोस्रो चरणमा प्रवेश गर्दैछ।
निर्वाचनमा म नेपाली कांग्रेसको “रुख” चुनाव चिह्न लिएर भोट माग्न तपाईंहरूको घर दैलोमा आएँ। लोकतान्त्रिक निर्वाचन जय र पराजय भन्दा माथि एउटा संंस्कार र संस्कृतिको विकास गर्ने पद्धति हो र मेरो पार्टी नेपाली कांग्रेसले यसलाई बुझ्दै आएको छ।
नेपाल राष्ट्रको एकता, अखण्डता र सार्वभौमिकताको रक्षा र संवर्धन लोकतान्त्रिक पद्धतिवाट आम नागरिकको भरोसा र विश्वास जितेको सरकारले मात्र गर्न सक्छ। यसै लोकतान्त्रिक पद्धतिलाई आत्मसात गरेर सक्षम र योग्य युवाहरू भर्खरै सम्पन्न निर्वाचनमा विजयी हुनुभएको छ। युवाहरू जो यो राष्ट्रको परिवर्तनका वाहक हुन, भावी संसदमा हामी नीति निर्माणमा पुगेको देख्नेछौं। यो खुशीको कुरा हो।
मोरङ क्षेत्र नं–६, जस्ले लोकतान्त्रिक विरासतको लामो इतिहास र संघर्षका अनेकन् गाथाहरू बोकेको छ, त्यस क्षेत्रबाट अत्यधिक बहुमतका साथ विजयी हुनु भएकी रुविना आचार्यलाई म बधाई दिन चाहन्छु। उहाँले आफ्नो कार्यकालमा यस क्षेत्रका जनताको सेवा, सुधार र समृद्धिमा गर्ने काममा मेरो साथ र समर्थन रहने छ । त्यस्तै सम्पन्न निर्वाचनमा मलाई आफ्नो मत प्रयोग गरेर विश्वास र भरोसा गर्ने मोरङ क्षेत्र नं– ६ का सवै मतदातालाई म अन्तष्करणबाट धन्यवाद दिन चाहन्छु, आभारी छु।
निर्वाचन शान्तिपूर्वक सम्पन्न गर्न सफल भएकामा सवै प्रशासक, सुरक्षा निकाय लगायतलाई पनि म धन्यवाद दिन चाहन्छु । अन्तमा, मलाई लामो समयदेखि मोरङ क्षेत्र नं–६ वाट निर्वाचित गराएर पठाउने मेरा मतदाताहरु सँग मेरो पराजयले कुनै फरक पर्ने छैन। मेरो यस क्षेत्रसँग जुन अटुट सम्वन्ध र प्रेम छ त्यसको निरन्तरतामा रत्तिभर पनि आँच आउँन दिने छैन। म विश्वास दिलाउन चाहन्छु।
-1746009348.jpg)
