दाङ–२ मा राष्ट्रिय स्वतन्त्र पार्टी (रास्वपा) का सहमहामन्त्री विपिन आचार्य निर्वाचित भएका छन्।
३९ वर्षीय आचार्यले एमाले महासचिव शंकर पोखरेललाई पराजित गर्दै उनी निर्वाचित भएका हुन्। उनले ४३ हजार ५५९ मत पाए।
शंकर पोखरेलले १५ हजार २८७ मत ल्याएका छन्।
विपिन तुलसीपुर उपमहानगरपालिका–१२ मा जन्मिएका हुन्।
उनी जन्मिएको ठाउँ दाङको क्षेत्र नं. ३ अन्तर्गत पर्छ। त्यसैले फागुन २१ गतेको निर्वाचनमा उनले आफैलाई भोट हाल्न पाएनन्।
विपिन राष्ट्रिय स्वतन्त्र पार्टीका संस्थापकमध्ये एक हुन्। उनी पार्टीका सहमहामन्त्रीसमेत हुन्।
२०७९ को निर्वाचनमा यस निर्वाचन क्षेत्रबाट विशाल अधिकारी उम्मेदवार थिए। उनले झन्डै १५ हजार मत ल्याएका थिए। यसपटक रास्वपाले दाङको क्षेत्र नं. १ र ३ मा पुरानै उम्मेदवार दोहोर्याए पनि विपिन उम्मेदवार बनेपछि विशालको यात्रा अन्तिममा आएर रोकिएको थियो। निर्वाचनमा उठ्ने सम्पूर्ण तयारी विशालले गरेका थिए।
विपिनको स्कुले शिक्षा बोर्डिङ स्कुलबाट सुरु भएका थिए।
उनले अन्नपूर्ण स्कुलमा कक्षा १–५ सम्मको पढाइ पूरा गरे। त्यसपछि घोराहीस्थित दीपशिखा बोर्डिङ स्कुलबाट कक्षा ६–१० सम्मको पढाइ पूरा गरे।
त्यसपछि विपिन बायोटेक इन्जिनियरिङ अध्ययनका लागि भारतको पुणे पुगे। उनले काठमाडौं विश्वविद्यालयबाट एमबीएसम्मको अध्ययन पूरा गरेका छन्।
विपिन र रवि लामिछानेको सम्बन्ध गोरखा मिडिया प्रालिमा काम गर्दा प्रगाढ बनेको हो।
विपिन त्यही मिडियामा क्रिएटिभ डाइरेक्टरका रूपमा कार्यरत थिए।
२०७९ जेठ ७ गते राष्ट्रिय स्वतन्त्र पार्टीका संस्थापकमध्ये एक विपिनलाई पार्टीको नाम, चुनाव चिन्ह र रङ छनोटको जिम्मेवारी दिइएको थियो।
यिनै विपिनले पार्टीको पहिलो वाचापत्र पनि लेखेका थिए। त्यसपछि उनले अभियान विभागको जिम्मेवारी सम्हाले। २०८० मंसिर १४ गते उनी पार्टीको सहमहामन्त्री बने।
पारिवारिक पृष्ठभूमि नियाल्दा उनका बुवा शिक्षक थिए। विगतमा उनको घरपरिवार नेकपा (एमाले) निकट मानिन्थ्यो। विपिन २०८२ वैशाख १ गते पार्टीको प्रशिक्षण विभाग प्रमुख बनेका थिए।
२०८२ मंसिर १४ गते पार्टीको उम्मेदवार छनोट विधिबाट सबैभन्दा अब्बल हुँदै समानुपातिक बन्दसूचीमा पहिलो नम्बरमा नाम सूचीकृत भएको कुरा उनले आफ्नो वाचापत्रमा उल्लेख गरेका छन्।
समानुपातिक सूचीबाट नाम फिर्ता लिएर २०८२ माघ ६ गते दाङ–२ बाट प्रत्यक्षतर्फ उम्मेदवारी दर्ता गरेका थिए। आफू जन्मेको ठाउँलाई समृद्ध बनाउने अठोटका साथ आफू प्रत्यक्षतर्फको उम्मेदवार बनेको उनले बताउने गरेका थिए।
उनै विपिनले नेकपा (एमाले)का महासचिव तथा तुलसीपुर–१९ हाडिमेका स्थायी बासिन्दा शंकर पोखरेललाई पराजित गरेका छन्। यससँगै विपिनको चर्चा थप चुलिएको छ।
यस निर्वाचन क्षेत्रमा नेपाली कांग्रेसका किरणकिशोर घिमिरे, नेपाल कम्युनिस्ट पार्टीका निर्मल आचार्यलगायत प्रतिस्पर्धी थिए।
-1746009348.jpg)
