समानुपातिकतर्फ झन्डै आधा मतगणना- अहिलेकै अनुपातमा कुन दलले कति सिट जित्छन्?

सेतोपाटी संवाददाता

काठमाडौं, फागुन २४

समानुपातिक तर्फको लगभग आधा मतगणना सम्पन्न हुँदा राष्ट्रिय स्वतन्त्र पार्टीले झण्डै ५० प्रतिशत मत प्राप्त गरेको छ।

फागुन २१ गते भएको प्रतिनिधि सभा निर्वाचनमा ११० सिटका लागि मतदाताले समानुपातिक निर्वाचन प्रणालीअन्तर्गत दलका लागि मत दिएका थिए।

हालसम्म ५२ लाख मतगणना सम्पन्न भएको छ। मतदानमा १ करोड ९ लाख मत खसेको थियो।

जारी मतगणना अनुसार रास्वपाले ४९ दशमलव १३ प्रतिशत मत प्राप्त गरेको छ।

नेपाली कांग्रेसले १६ दशमलव ६१ प्रतिशत, नेकपा एमालेले १४ दशमलव २९ प्रतिशत, नेपाली कम्युनिष्ट पार्टीले ६ दशमलव ७९ प्रतिशत र राष्ट्रिय प्रजातन्त्र पार्टीले ३ दशमलव ५५ प्रतिशत मत प्राप्त गरेका छन्।

हर्क साम्पाङ नेतृत्वको श्रम संस्कृति पार्टीले २ दशमलव ६० प्रतिशत र जसपा नेपालले १ दशमलव २३ प्रतिशत मत ल्याएको छ।

प्रतिनिधि सभा निर्वाचनमा समानुपातिकतर्फ ३ प्रतिशत मत कटाउने दलले सिटमा भाग पाउँछन्। जारी मतगणनाअनुसार रास्वपा, कांग्रेस, एमाले, नेकपा र राप्रपाले मात्र ३ प्रतिशतको ‘थ्रेसहोल्ड’ कटाउने देखिएको छ।

मतगणना अहिलेकै अनुपातमा अघि बढे रास्वपाले समानुपातिकतर्फ ६० सिट प्राप्त गर्नेछ। त्यस्तै नेपाली कांग्रेसले २० सिट, नेकपा एमालेले १७ सिट, नेकपाले ८ सिट र राप्रपाले ५ सिट जित्नेछ।

यदि समानुपातिकतर्फ अहिलेकै अनुपातमा रास्वपाले मत कायम राखे उसले दुई तिहाइ सिट प्राप्त गर्न सक्नेछ। रास्वपाले अहिलेसम्म प्रत्यक्षतर्फ १ सय २१ सिटमा जित हात पारेको छ। उसका ४ उम्मेदवार मतगणनामा अग्रता हासिल गरिरहेका छन्।

केही सिटमा उसका उम्मेदवार फराकिलो अन्तरले अगाडि छन्। गोरखा २ मा रास्वपाका कविन्द्र बुर्लाकोटी १३ हजार मतान्तरले अगाडि छन्। बर्दिया २ मा रास्वपाका श्रीधर पोखरेल ९ हजार २ सय ७६ मतले अगाडि छन्। गोरखा १ र नुवाकोट १ मा रास्वपाका उम्मेदवार सामान्य अन्तरले अगाडि छन्।

यदि मतगणना भइरहेका सिटमा समेत रास्वपा विजयी भए उसले प्रत्यक्षतर्फ १ सय २५ सिट प्राप्त गर्नेछ। समानुपातिक तर्फको ६० सिट जोड्दा रास्वपा १ सय ८५ सिटमा विजयी हुन्छ।

२७५ सदस्यीय प्रतिनिधि सभामा दुई तिहाइ बहुमत प्राप्त गर्न १ सय ८४ सिटमा जित हात पार्नुपर्छ। रास्वपाले अहिलेकै अनुपातमा मत प्राप्त गर्ने हो भने उसले दुई तिहाइ सिटमा जित हात पार्न सक्ने देखिन्छ।

Party	Votes	Vote Percentage	PR Seats
Rastriya Swatantra Party	2593056	49.13%	60
Nepali Congress	876309	16.61%	20
CPN (UML)	754216	14.29%	17
Nepali Communist Party	358204	6.79%	8
Rastriya Prajatantra Party	187257	3.55%	5