नेपाली कांग्रेसका नेता पूर्णबहादुर खड्काले अस्वाभाविक महत्त्वाकांक्षा, आवेग र आग्रहबाट मुक्त भएर बृहत एकताका साथ अघि बढ्नुपर्ने बताएका छन्।
फागुन २१ को प्रतिनिधि सभा निर्वाचन परिणामले कांग्रेसलाई गम्भीर सन्देश दिएको पनि उनले बताएका छन्।
कांग्रेसले प्रत्यक्षतर्फ १८ सिटमा जितेको छ। विशेष महाधिवेशन भएको ५० दिनमा चुनाव भएको थियो।
‘प्रतिनिधिसभाको निर्वाचनको परिणामले विशेष गरी सबैभन्दा बढी विभिन्न तहमा विभिन्न जिम्मेवारीमा क्रियाशील हामी कांग्रेसीहरूलाई गम्भीर सन्देश प्राप्त भएको छ, हाम्रा भगवानरूपी पदमआदरणीय मतदाताहरूको निर्णयबाट,’ सामाजिक सञ्जाल एक्समा खड्काले लेखेका छन्।
विशेष महाधिवेशनमा गगन थापा नेतृत्वमा नयाँ कार्यसमिति आएको थियो। उक्त कार्यसमितिलाई निर्वाचन आयोगले मान्यता दिएको थियो। त्यसविरूद्ध निवर्तमान सभापति शेरबहादुर देउवा र नेता खड्का सर्वोच्च अदालत गएका थिए।
यसबीचमा निर्वाचन भएको थियो।
खड्काले अब आवेग, उत्तेजना र बदलाको भावनाबाट मुक्त भएर अत्यन्त संयम, जिम्मेवारी बोधका साथ अघि बढ्नुपर्ने पनि बताएका छन्।
‘हामी सबैले म म भन्दै विगतको निर्मम समीक्षा गर्दै अस्वाभाविक महत्त्वाकांक्षा, आवेग र आग्रहबाट मुक्त भएर पार्टीको व्यापक-बृहत एकताका लागि निष्ठा र समर्पण भावका साथ अगाडि बढ्नु पर्ने हामी सबैको नैतिक कर्तव्य र जिम्मेवारी छ,’ खड्काले भनेका छन्, ‘हाम्रा अगाडि खडा भएको हिमालयन चुनौतीको सामाना गर्ने यही नै उपयुक्त बाटो हो त्यस्तो लाग्छ।’
सभापति थापाले चुनावी पराजयको जिम्मेवारी लिँदै पदबाट राजीनामा दिने कुरा उपसभापति विश्वप्रकाश शर्मासँग राखेका छन्। शर्माले भने अहिले राजीनामा नदिन सुझाव दिएका छन्।
यो पनि: गगन थापाले भने- म राजीनामा दिन्छु
-1746009348.jpg)
