रूपन्देही क्षेत्र नं. २ मा नेपाली कांग्रेसबाट उम्मेदवार बनेका चुन्नप्रसाद पौडेलले निर्वाचनमा भएको खर्च विवरण सार्वजनिक गरेका छन्।
पौडेलले निर्वाचनमा २४ लाख ४३ हजार ८२३ रूपैयाँ खर्च भएको भन्दै मंगलबार निर्वाचन आयोगमा खर्च विवरण बुझाएका हुन्।
पौडेलले बुझाएको खर्च विवरण अनुसार सबैभन्दा धेरै मसलन्द, छपाइ र प्रिन्टिङमा ९ लाख २१ हजार ७४० रूपैयाँ खर्च भएको उल्लेख छ।
त्यस्तै खाना, नास्ता तथा चियापानमा ५ लाख ४५ हजार ६८९, बिजुली साउन्ड सिस्टममा २ लाख ७४ हजार ७२० तथा अफिस, प्रचार प्रसार र कार्यालय भाडामा २ लाख ४० हजार खर्च भएको उल्लेख छ।
त्यसैगरी सवारी साधन तथा इन्धनमा १ लाख ७९ हजार ८९४, गाडी भाडा १ लाख ५० हजार हजार र मञ्च व्यवस्थापन, कुर्ची तथा टेन्टमा १ लाख ३१ हजार ७८० रूपैयाँ खर्च भएको उल्लेख छ।
रूपन्देही क्षेत्र नं. ३ का नेकपा एमालेका उम्मेदवार वासुदेव घिमिरेले निर्वाचन आयोगमा १९ लाख ४६ हजार हाराहारीको खर्च विवरण पेस गरेका छन्।
घिमिरेले सबैभन्दा बढी सवारी साधनमा ५ लाख ७९ हजार २००, खाना, खाजा र आवासमा ४ लाख ४६ हजार, प्रचार प्रसार सामग्रीमा २ लाख ३६ हजार, निर्वाचन प्रतिबद्धता पत्र छपाइमा २ लाख २७ हजार खर्च भएको उल्लेख गरेका छन्।
त्यस्तै वडास्तरीय घरदैलो कार्यक्रममा १ लाख ८० हजार, झन्डा र ब्यानरमा ६६ हजार, नमुना मतपत्र छपाइमा ५७ हजार ५ सय, क्षेत्रीय निर्वाचन कार्यालय सञ्चालनमा ४४ हजार ६ सय र मनोनयन दर्तामा १० हजार गरी १९ लाख ४६ हजार ३ सय रूपैयाँ खर्च भएको घिमिरेले निर्वाचन आयोगमा पेस गरेको खर्च विवरणमा उल्लेख छ।
निर्वाचन आयोगले प्रतिनिधिसभा सदस्य निर्वाचन प्रचारप्रसारका क्रममा उम्मेदवारले गर्न पाउने अधिकतम खर्च निर्धारण गरेको थियो।
आयोगले प्रत्यक्षतर्फका १६५ वटा निर्वाचन क्षेत्रलाई भौगोलिक अवस्था, पहुँच, सुविधा र सेवा नेटवर्क मूल्यांकनका आधारमा पाँच वर्गमा विभाजन गरी २५ लाख देखि ३३ लाख रूपैयाँ सम्मको खर्च निर्धारण गरेको थियो।
जसअनुसार रूपन्देहीका पाँच वटै निर्वाचन क्षेत्रका उम्मेदवारहरूले २९ लाख रूपैयाँको सीमाभित्र रहेर खर्च गर्न पाउने गरी आयोगले खर्च निर्धारण गरिदिएको थियो।
-1746009348.jpg)
