पोखरा महानगरपालिकाका मेयर धनराज आचार्यले पूर्वमन्त्री एवम् म्याग्दीबाट स्वतन्त्र उम्मेदवारी दिएर निर्वाचित भएका महावीर पुनलाई पोखराका सडकमा पुस्तक नबेच्न आग्रह गरेका छन्।
पूर्वमन्त्री पुनले सामाजिक सञ्जालमा पोस्ट लेखेर बुधबार पोखराका विभिन्न ठाउँमा पुस्तक बेच्ने योजना भएको उल्लेख गरी सहभागिताका लागि आह्वान गरेका थिए।
पुनले बिहान १० बजे चिप्लेढुंगा, १ बजे सभागृह चोक र ४ बजेपछि विरौटा चोकमा किताब बेचिने भनेका थिए।
पुनको उक्त सूचनापश्चात फेसबुकमार्फत नै सन्देश जारी गरी पोखराका मेयर धनराज आचार्यले सडकमा पुस्तक नबेच्न भनेका हुन्।
मेयर आचार्यले पूर्वमन्त्री पुनको काम सराहनीय भएको र उनको अभियानलाई सहयोग गर्ने भावनाले नै धेरैले पुस्तक खरिद गरिरहेको पनि बताएको छ।
'तर, बिना दर्ता वा आवश्यक अनुमति कुनै पनि वस्तुको बिक्री–वितरण गर्नु कानुनी रूपमा जटिल हुन सक्छ भन्ने कुरा तपाईंलाई अवगत नै छ। पछिल्ला केही दिनमा सडकमा उभिएर पुस्तक बिक्री गर्दा यातायातमा असहजता भएको तथा केही अनावश्यक सवाल–जवाफ भएको देखिएको छ, जुन तपाईं जस्तो सम्मानित व्यक्तित्वलाई सुहाउने अवस्था होइन,' मेयर आचार्यले भनेका छन्।
महावीर पुन एक जना व्यक्ति मात्र नभई देशले सम्मान गरेको आदरणीय व्यक्तित्व र सार्वजनिक नेतृत्वको स्थानमा रहेको पनि स्मरण गराएको छ। मेयर आचार्यले बरू पुस्तक विक्री वितरणमा पुस्तक व्यवसायी महासंघमार्फत सहयोग गर्न सकिने पनि बताएको छ।
'फुटपाथमा साना व्यवसाय गर्ने व्यक्तिहरूलाई नगर प्रहरीले नियमअनुसार हट्न अनुरोध गर्दा, त्यही नियम तपाईंमाथि पनि लागू हुँदा अनावश्यक विवाद सिर्जना हुनु उपयुक्त देखिँदैन। त्यसैले माननीयज्यू, अब तपाईंको भूमिका देशका लागि नीति र कानुन निर्माण गर्ने हो र पुस्तक ब्यबसायिको भूमिका पुस्तक बिक्री–वितरण गर्ने हो। यदि तपाईंको पुस्तकको स्टक उपलब्ध गराउनु भयो भने, हामी महासंघमार्फत त्यसलाई बिक्री गरी उचित भुक्तानी तपाईंलाई उपलब्ध गराउन सहजीकरण गर्न सक्छौं,' मेयर आचार्यले भनेका छन्।
-1746009348.jpg)
