नेकपा एमालेका केन्द्रीय सदस्य नरेश रोकायले निर्वाचनमा पार्टीले अनपेक्षित पराजय व्यहोरेको भन्दै यसको जिम्मेवारी सिंगो सचिवालय टिमले लिनुपर्ने बताएका छन्।
उनले केही नेता पटक पटक जनताबाट अस्वीकृत भएको भन्दै उनीहरूले मार्गप्रशस्त गर्नुपर्ने धारणा राखेका छन्।
‘यसपटकको आमनिर्वाचनमा नेकपा (एमाले) को लज्जास्पद पराजयको मुख्य जिम्मेवारी कार्यकारी नेतृत्वको हो। नेतृत्व भनेको अध्यक्ष मात्रै होइन, सिंगै सचिवालय हो, सचिवालय भित्र पनि मूल नेतृत्वलाई गुमराहमा राखेर आफू अनुकूलको निर्णय गराउन मूल भूमिका खेल्ने कोर समूहको स्वार्थकेन्द्रित निर्णयका कारण हाम्रो गौरवशाली पार्टी अत्यन्तै लज्जास्पद पराजयको शिकार बन्न पुगेको हो,’ उनले भनेका छन्।
निर्वाचनमा प्रतिस्पर्धाको निम्ति तयार रहन हार्दिकता र एकताको सर्वाधिक खाँचो रहने भन्दै एमालेमा ओठे एकता मात्रै रहेको टिप्पणी गरेका छन्।
विशेषतः महाधिवेशनमा देखिएको पक्षधरतालाई पार्टी जीवनको लोकतान्त्रीकरणको विषय ठान्नु पर्नेमा वर्गसंघर्ष ठानिएको बताएका छन्।
‘निर्वाचन विशेष कार्यविभाजन, समानुपातिक बन्दसूची, राष्ट्रिय सभाका उम्मेदवार र प्रतिनिधिसभाका प्रत्यक्ष उम्मेदवारको टिकट वितरण लगायतमा गरिएको, देखिएको विभेद यसका ज्वलन्त उदाहरण हुन्,’ उनले भनेका छन्, ‘जेनजी आन्दोलनमा केही सबल पक्ष थिए र थुप्रै दुर्बल पक्षहरू थिए। हाम्रो पार्टीले सबल पक्षको प्रशंसा र अपनत्व गर्न छोडेर दुर्बल पक्षमाथि एकोहोरो कटाक्ष मात्रै गर्नाले उक्त उमेर समूहको मत सर्लक्कै हाम्रो विरूद्धमा प्रयोग भयो। जसको फलस्वरूप इतिहासकै सर्वनाक पराजय हामिले भोग्नुपर्यो।’
लोकतन्त्रमा दलहरू प्रधान हुने, दलीय प्रतिस्पर्धामा श्रेष्ठता हासिल गर्ने दलहरू जिउँदो रहने उनको भनाइ छ।
राजनीतिक दलहरू जिउँदो रहन दलका नेताहरू जननिर्वाचित हुनुपर्ने उनले बताएका छन्।
‘पटक पटक जनताबाट पराजित नेताहरूले दलको नेतृत्व गर्न सुहाउँदैन, जननिर्वाचित नेतृत्वले मात्रै राजनीतिक दलको नेतृत्व गर्ने नैतिक अधिकार प्राप्त गरेका हुन्छन। तसर्थ, पटक पटक जनतावाट पराजित नेताहरुले पार्टीको मुख्य जिम्मेवारीबाट मार्गप्रशस्त गर्नुपर्दछ। पार्टीलाई पुनर्जीवित र पुनस्र्थापित गर्न तपाईंहरूको राजीनामाले ठोस भुमिका खेल्नेछ,’ उनले भनेका छन्।
-1746009348.jpg)
