नेपाली कांग्रेसको पूर्वउपसभापति पूर्णबहादुर खड्काले पार्टीका नेता रमेश लेखक र एमाले अध्यक्ष केपी शर्मा ओली पक्राउबारे छुट्टै विज्ञप्ती जारी गरी धारणा सार्वजनिक गरेका छन्।
विशेष महाधिवेशनअघि कार्यवाहक सभापति रहेका खड्काले सोही हैसियतमा विज्ञप्ती जारी गरी शनिबारको राजनीतिक घटनाक्रमबारे धारणा सार्वजनिक गरेका हुन्।
खड्काले दुवै जना नेताहरूको पक्राउलाई संविधान र प्रचलित कानुन विपरीत भन्दै सरकारको उक्त कामको भर्त्सना गरेका छन्। साथै दुवैलाई यथाशीघ्र रिहा गर्न पनि माग गरिएको छ।
खड्काले नेताहरूको पक्राउले संवैधानिक र कानुनी प्रश्न उब्जाएको पनि बताएका छन्।
'आयोगले अनुसन्धान तहकिकात र अभियोजन गर्न गराउन नेपाल सरकारलाई सिफारिस गरी पठाउने भनिएकोमा कुनै पनि प्रक्रिया पूरा नगरी तत्कालीन सरकारका पदाधिकारीहरूलाई पक्राउ गर्नु कानुनी राज्यको बर्खिलाप छ, राजनीतिकरूपमा पुर्वाग्रह प्रेरित छ,' विज्ञप्तीमा भनिएको छ।
खड्काले आयोगको कार्यादेश बमोजिम भाद्र २३ र २४ गते दुबै दिनको घटनाको छानबिन गर्नु पर्नेमा भाद्र २४ गतेको घटनाबाट भएको मानवीय क्षति, सरकारी संरचनाको क्षति, राजनीतिक दलका कार्यालयहरू र व्यापारिक प्रतिष्ठान तथा निजी सम्पत्ति माथी भएको नोक्सानी र संलग्न व्यक्तिहरु बारे बिल्कुल मौन रहनुबाट पनि प्रतिवेदन पक्षपातपूर्ण भएको प्रष्ट हुने बताएका छन्।
'सरकार गठन भए लगत्तै दुराशयपूर्ण तबरबाट भएको यस राजनीतिक प्रतिशोधले सरकार संविधान र लोकतन्त्रको प्रतिबद्धताबाट पछाडि हट्न पुगेको देखिन्छ। यस कार्यको संबैधानिक, कानूनी र राजनीतिकरूपमा प्रतिबाद गर्ने नेपाली कांग्रेसको यो बैठक निर्णय गर्दछ। साथै आईपर्ने जुनसुकै परिस्थितिको राजनीतिकरुपमा सामना गर्न देश भरिका पार्टीका साथीहरूलाई तयार रहन हार्दिक अपिल गर्दछ,' पूर्वउपसभापति खड्काले जारी गरेको विज्ञप्तीमा भनिएको छ।
यो पनिः भदौ २३ र २४ गतेका दुवै घटनामा संलग्नलाई कारबाही हुनुपर्छ, हाम्रो साथ छ- कांग्रेस
-1746009348.jpg)
