अमेरिकी राष्ट्रपति डोनाल्ड ट्रम्पले 'वास्तविक सम्झौता' पालना नभए इरानमाथि इतिहासमा कसैले नदेखेको क्षति हुने गरी आक्रमण गर्ने चेतावनी दिएका छन्।
युद्धविराम घोषणाको भोलिपल्टै ट्रम्पले इरानमाथि इतिहासकै ठूलो आक्रमण गर्ने चेतावनी दिएका हुन्।
'यदी कुनै कारणले सम्झौता पालना भएन भने त्यसपछि हुने कारबाही यति ठूलो, शक्तिशाली र कडा हुनेछ कि त्यस्तो कारबाही अहिलेसम्म कसैले देखेकै हुनेछैन,' ट्रम्पले लेखेका छन्।
ट्रम्पले अमेरिकी सेना, हतियार र सैन्य संरचना इरानकै वरिपरि क्षेत्रमा यथावत रहने पनि प्रष्ट पारेका छन्।
'कमजोर भइसकेको शत्रु विरूद्ध आवश्यक सैन्य तयारी हामीले यथावत् नै राखेका छौं। र वास्तविक सम्झौता पूर्ण रूपमा पालना नभएसम्म यो हट्दैन,' ट्रम्पले लेखेका छन्।
ट्रम्पले भनेको वास्तविक सम्झौता इरानले परमाणु कार्यक्रम रोक्ने र हर्मुज निर्वाध सञ्चालन हुन दिनेबारे छ।
यद्यपि इरानले भने युद्धविरामका शर्तमा परमाणु कार्यक्रम रोक्ने भन्ने उल्लेख नभएको दाबी गरेको छ। ट्रम्पले भने अमेरिकाको मूल उद्धेश्य नै त्यही भएका कारण सम्झौताको सर्तमा आणविक कार्यक्रम र हर्मुज खुला हुनुपर्ने बताएका छन्।
उनले परमाणु हतियार नबनाउने सहमति भएको दाबी नै गरेका छन्।
सम्झौता नभए अमेरिकी सेना फेरि सैन्य कारबाहीका लागि तयारी अवस्थामा रहेको उनले बताएका छन्।
'हाम्रो सेना अहिले तयारी गर्दैछ, आराम गरिरहेको छ र आवश्यक परे अर्को कारबाहीका लागि तयार छ,' उनले भने।
युद्धविराम लगत्तै भने ट्रम्पले अब मध्यपूर्वमा स्वर्णिम युग आउन सक्ने बताएका थिए। उनले इरानले पुनर्निर्माण समेत गर्ने सक्ने र त्यसका लागि अमेरिकाले पनि सहायता गर्ने बताएका थिए। त्यतिमात्रै होइन युद्धविरामका लागि मध्यस्थता गर्ने पाकिस्तानी प्रधानमन्त्री शहबाज सरिफलाई धन्यवाद दिँदै विश्व शान्तिका लागि महत्त्वपूर्ण दिन रहेको बताएका थिए।
इरानले युद्धविरामका लागि तयार हुँदा आणविक कार्यक्रम रोक्ने सर्त नभएको उल्लेख गर्दै अमेरिकाले अनावश्यक दबाब दिएको बताएका छन्।
त्यस्तै इरानले युद्धविरामपछि पनि इसराइलले लेबननमा हमला गरेको भन्दै उसले थप वार्ताको औचित्य नभएको पनि बताएको छ।
इसराइल र अमेरिकाले युद्धविराममा लेबनन समावेश नभएको प्रष्ट पारेका छन्। यद्यपि बुधबार पाकिस्तानले मध्यस्थता गरेको युद्धविराममा लेबननसहित युद्धका सम्पूर्ण पक्षहरू समावेश रहेको भनेर पाकिस्तानी प्रधानमन्त्री शहबाज शरिफले बताएका थिए।
लगत्तै इसराइलले लेबनन युद्धविराममा समावेश नभएको दाबी गरेर त्यहाँ भीषण हमला गरेको थियो। बुधबार एकैदिन लेबननमा २५० जना भन्दा बढी मानिसहरू मारिएका छन्।
उक्त घटनापछि इरानी सभामुख मोहम्मद बाघेर गालिबाफले वार्ताको औचित्य नभएको बताएका छन्।
युद्धविराम घोषणापछि पाकिस्तानले इस्लामावादमा हुने गरी दुवै देशलाई छलफलका लागि निम्तो गरेको थियो। इरानले युद्धविराम लगत्तै वार्ताका लागि तयार रहेको बताएको थियो।
-1746009348.jpg)
