उपसभामुख पदका लागि आज मनोनयन भएको छ।
श्रम संस्कृति पार्टी र राष्ट्रिय प्रजातन्त्र पार्टीले उपसभामुख पदमा उम्मेदवारी दिएका छन्।
श्रम संस्कृतिबाट सांसद रूविकुमारी ठाकुर र राप्रपाबाट सांसद सरस्वती लामा उपसभामुख पदमा उम्मेदवार छन्।
सत्तारूढ राष्ट्रिय स्वतन्त्र पार्टीले श्रम संस्कृति पार्टीको उम्मेदवारलाई सघाउने भएको छ।
श्रम संस्कृतिबाट सांसद आरेन राई प्रस्तावक र रास्वपा सांसद अशोककुमार चौधरी समर्थक रहेर उपसभामुख पदमा ठाकुरको उम्मेदवारी परेको छ।
लामाको भने प्रस्तावक र समर्थक राप्रपाकै छन्।
राप्रपा संसदीय दल नेता ज्ञानेन्द्र शाहीले आज पत्रकारहरूसँग कुराकानी गर्दै रास्वपाले उपसभामुख पदमा राप्रपाका उम्मेदवारलाई सहयोग गर्ने कुरा बताएका थिए।
‘उपसभामुख पदमा राप्रपाले उम्मेदवारी दिओस्, हामी समर्थन गर्छौं भनेर रास्वपा सभापति रवि लामिछानेले भन्नुभएको छ,’ शाहीले भनेका थिए।
सोही आधारमा रास्वपाले राप्रपाका उम्मेदवारलाई उपसभामुखमा समर्थन गर्ने खबर आएका थिए।
प्रतिनिधि सभामा श्रम संस्कृति र राप्रपा प्रतिपक्षी दल हुन्। श्रम संस्कृतिका ७ र राप्रपाका ५ जना सांसद छन्।
सभामुखमा रास्वपाका उपसभापति डोलप्रसाद अर्याल चैत २२ गते निर्विरोध भएका थिए। एकै दलबाट सभामुख र उपसभामुख बन्न मिल्दैन।
त्यसैले रास्वपाले उपसभामुखमा श्रम संस्कृति पार्टीलाई सहयोग गर्ने भएको हो।
रास्वपा प्रवक्ता मनिष झाले उपसभामुख पदमा श्रम संस्कृति पार्टीलाई सहयोग गर्ने निर्णय भएको बताए।
-1746009348.jpg)
