श्रम संस्कृति पार्टीका अध्यक्ष हर्क साम्पाङले सुकुम्बासी वस्ती हटाउने योजना तत्काल रोक्न माग गरेका छन्।
शनिबारदेखि काठमाडौंका सुकुम्बासी वस्ती हटाउने सरकारले तयारी थालेपछि विज्ञप्ती जारी गर्दै अध्यक्ष साम्पाङले त्यस्ता गतिविधि रोकेर उचित क्षतिपूर्ति र पुनर्वासको व्यवस्थापन गरेर मात्रै सरकार अघि बढ्नुपर्ने बताएका हुन्।
लामो समयदेखि बसेको र राज्यले पनि पहिले नै पहल नगरेका कारण मानिसहरूले ती जग्गाहरूमा जीवनभरको कमाइ लगाएर घर बनाएको उनले बताएका छन्।
त्यस बेला तात्कालीन नगरपालिका र राज्य संयन्त्रले इजाजत दिएरै बसे होलान् ती बस्तीहरु ! त्यसो भएको हुँदा उचित क्षतीपूर्ती र पुनर्बासको व्यवस्थापन गरेर मात्रै त्यस्ता जग्गा खाली गराउने कार्यमा सरकार लाग्नु पर्छ अन्यथा जनतालाई बेघर बनाएर न सुशासन हुन्छ न आर्थिक उन्नति र विकास,' उनले भनेका छन्।
जनताको घर भत्काउनु, जनतालाई बेघर बनाउनु, लछारपछार गर्नु, गालीगलौज गर्नु, लाठी, बुट, बन्दुक देखाएर तर्साउनु र राज्य आतंक मच्चाउनु संविधानको बर्खिलाप हुने पनि उनले बताएका छन्। यस्ता घटनाले लोकतन्त्रको मूल्य मान्यतालाई नराम्ररी लत्याएको र सरकारले निरंकुश चरित्र देखाएको उनले बताएका छन्।
'यस्ता मानव अधिकार विरोधी गतिविधिको श्रम संस्कृति पार्टी सख्त निन्दा, भर्त्सना र विरोध गर्दछ,' उनले विज्ञप्तीमा भनेका छन्।
-1746009348.jpg)
