गत वर्ष सामाजिक सञ्जालमा पोस्ट गरेको एउटा फोटोले अमेरिकी राष्ट्रपति डोनाल्ड ट्रम्पलाई खतरनाक धम्की दिएको भनेर पूर्व एफबिआई निर्देशक जेम्स कोमीमाथि मुद्दा चलाइएको छ।
समुद्र किनारमा रहेका सिपीहरूलाई '८६ ४७' लेखिने गरी मिलाएर राखिएको तस्बिर कोमीले इन्स्टाग्राममा मे २०२५ मा पोस्ट गरेका थिए।
'मेरो ‘बीच वाक’मा फेला परेको राम्रो सिपीको आकृति,' कोमीले सो इन्स्टाग्राम पोस्टमा लेखेका थिए।
दोस्रो कार्यकालमा ट्रम्प अमेरिकाका ४७ औं राष्ट्रपति हुन् भने अमेरिकाको अनौपचारिक बोलीचालीमा ‘८६’ को अर्थ कसैको हत्या गर्नु वा हटाउनु हुन्छ।
उनले सो तस्बिर पोस्ट गर्ने वित्तिकै त्यसले ट्रम्पलाई मार्ने धम्की दिएको भनेर आलोचना भएको थियो।
राजनीतिक सन्देश दिएको भनेर आफुले पोस्ट गरेको र त्यसको अर्थ हिंसात्मक हुनसक्छ भन्ने नसोचेका भनेर उनले लगत्तै पोस्ट गरेका थिए। पछि उनले सो तस्बिर राखेको पोस्ट मेटाएका थिए।
कोमीले सो तस्बिर पोस्ट गर्ने बित्तिकै फक्स न्यूजसँग कुरा गर्दै एफबिआई निर्देशकलाई त्यसको अर्थ हत्या हो भन्ने थाहा हुन्छ भनेर ट्रम्पले जिकिर गरेका थिए।
कोमीले सो आकृति आफुले नबनाएको र समुद्री किनारमा हिंड्दा भेटेको दाबी गर्दै आएका छन्।
बाराक ओबामाले एफबिआई निर्देशक नियुक्त गरेका कोमीले ट्रम्पले पहिलो कार्यकालको चुनाव जित्न रूससँग साँठगाँठ गरेको भनेर ट्रम्प राष्ट्रपति भएकै बेला छानबिन गरेका थिए। आफुलाई फँसाउन छानबिन गरेको भन्दै ट्रम्पले कोमीको कटु आलोचना गर्दै आएका छन्।
उत्तर क्यारोलिनाको संघीय ग्रान्ड जूरीले अहिले कोमीमाथि सो पोस्टका कारण मुद्दा चलाएको हो।
सिपीहरू '८६ ४७' बनाउने ढाँचामा मिलाइएको र उनको ट्रम्पसँगको सम्बन्धबारे जानकार कुनै पनि तर्कसंगत व्यक्तिले अमेरिकाका राष्ट्रपतिलाई हानि पुर्याउने उद्देश्यको गम्भीर अभिव्यक्तिको रूपमा बुझ्ने भनेर अभियोग पत्रमा दाबी गरिएको द वाशिङटन पोस्टले लेखेको छ।
कोमीले एक भिडियो बयान जारी गर्दै वर्तमान अमेरिकी प्रशासनको निन्दा र आफु निर्दोष भएको दाबी गरेका छन्।
'यो यसको अन्त्य हुनेछैन। म अझै निर्दोष छु, म अझै डराएको छैन र म अझै पनि स्वतन्त्र संघीय न्यायपालिकामा विश्वास गर्छु, त्यसैले अगाडि बढौं, ' उनले भनेका छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
