राष्ट्रिय स्वतन्त्र पार्टी (रास्वपा)ले असुरक्षित रूमा बस्दै आएका सुकुम्बासी बाहेकको हकमा अधिकार सम्पन्न प्राधिकरणको प्रतिवेदन अगाडि कारबाही नबढ्ने बताएको छ।
आइतबार बसेको पार्टीको सचिवालय बैठकले प्राधिकरण बनाएपछि दिइने सुझाव अनुसार काम अगाडि बढाउने निर्णय भएको हो। यस विषयमा सरकारलाई सुझाव समेत दिइने पार्टीका प्रवक्ता मनिष झाले जानकारी दिए।
‘असुरक्षित रूपमा बस्न बाध्यहरुलाई सुरक्षित गर्न राष्ट्रिय स्वतन्त्र पार्टीको प्राथमिकता रहेको र राष्ट्रिय स्वतन्त्र पार्टीको वाचापत्रको बुँदा नं. ८२ मा नै यसलाई व्यवस्थित गर्ने कुरा उल्लेख भएकाले असुरक्षित रूपमा बसोबास गर्दै आउनुभएका भूमिहीन सुकुम्बासी नागरिकहरूको हकमा बाहेक अन्यहरूमा प्राधिकरणको प्रतिवेदन पूर्व कुनै पनि कारबाही अगाडि नबढ्ने कुराको जानकारी गराउँदै सरकारलाई सोही अनुरुप गर्न सुझाव दिने,’ उनले भने।
अव्यवस्थित बसोबासलाई सम्बोधन गर्न सरकारले चाँडै अधिकार सम्पन्न प्राधिकरण गठन गर्ने पनि उनले बताए। त्यसकारण त्रासको शंकामा नपर्न अनुरोध गरेको छ।
साथै स्थानीय सरकारहरूले आफ्नो क्षेत्राधिकारको प्रयोग गरी संरचनाहरू भत्काइरहेको सन्दर्भलाई समेत ध्यानमा राखी स्थानीय सरकारलाई पनि यही मर्म अनुरूप व्यवस्थापन गर्न पार्टीले अनुरोध गर्ने उनले बताए।
त्यसैगरी रास्वपाले आगामी स्थानीय तह निर्वाचनका लागि पार्टीका उम्मेदवार छनोट गर्ने विधि ‘स्थानीय निर्वाचन उम्मेदवार छनोट रूपरेखा–२०८३’ लाई पारित गरेको छ। उक्त रूपरेखालाई प्रभावकारी रूपमा कार्यान्वयन गर्न सहमहामन्त्री विपिनकुमार आचार्यको संयोजकत्वमा ‘उम्मेदवार छनोट रूपरेखा कार्यान्वयन तथा समन्वय समिति’ गठन गर्ने निर्णय पनि भएको झाले जानकारी दिए।
सचिवालय बैठकले पार्टीको संसदीय दलको संशोधित विधान अनुमोदन गर्ने, पार्टीको ऐतिहासिक प्रथम महाधिवेशन सम्पन्न गर्न ‘महाधिवेशन कार्यविधि–२०८३’ पारित गर्ने र पार्टीको बागमती प्रदेश समितिको सिफारिस बमोजिम रसुवा जिल्ला समिति विघटन गरी नयाँ प्रक्रियाबाट समिति गठन गर्ने निर्णय गरेको छ।
-1746009348.jpg)
