बागमती प्रदेशका मुख्यमन्त्री इन्द्रबहादुर बानियाँले आफ्नो निवास तथा कार्यालयमा भएको छापामारीप्रति आपत्ति जनाउँदै त्यसले आफ्नो व्यक्तिगत र सामाजिक चरित्रमा आघात पुगेको बताएका छन्।
सोमबार उनले जारी गरेको प्रेस विज्ञप्तिमा सम्पत्ति शुद्धीकरण अनुसन्धान विभागले हेटौंडा र काठमाडौंस्थित आफ्ना घर तथा कार्यालयमा छापा मारी कागजात नियन्त्रणमा लिएकोप्रति गम्भीर ध्यानाकर्षण भएको उल्लेख गरेका छन्।
मुख्यमन्त्री बानियाँले आफू सुशासन, पारदर्शिता र भ्रष्टाचारमुक्त समाज निर्माणलाई प्राथमिकतामा राखेर काम गरिरहेको दाबी गर्दै प्रदेश सरकारको खर्च कटौती तथा आर्थिक मितव्ययीताका लागि निरन्तर प्रयासरत रहेको बताएका छन्।
साथै, योजना तथा कार्यक्रमहरू आवश्यकता र औचित्यका आधारमा पारदर्शी ढंगले अगाडि बढाइएको पनि उनले स्पष्ट पारेका छन्।
उनले राजनीतिक तथा व्यावसायिक जीवनबारे हुने छानबिनलाई सकारात्मक रूपमा लिएको जनाउँदै राज्यका कुनै पनि निकायले अनुरोध गर्दा उपस्थित हुन तयार हुँदाहुँदै अकस्मात् गरिएको छापामारीप्रति असन्तुष्टि व्यक्त गरेका छन्।
मुख्यमन्त्री बानियाँले संवैधानिक तथा कानूनी दायराभित्र रहेर हुने अनुसन्धानमा पूर्ण सहयोग रहने प्रतिबद्धता जनाउँदै उक्त घटनाबाट प्रदेशवासी र आफ्ना शुभेच्छुकहरू भ्रमित नहुन आग्रह गरेका छन्।
-1746009348.jpg)
