नेपाली कांग्रेसले महाधिवेशन गर्न नसकेका नेपाल तरूण दल, नेविसंघलगायत भ्रातृ संस्थाहरू विघटन गरेको छ।
तोकिएको समयमा महाधिवेशन गर्न नसकेको र अधिवेशन गर्न सक्ने आधारसमेत नदेखिएको भन्दै कांग्रेसले त्यस्ता सबै भ्रातृ संस्थाहरू विघटन गरेको छ।
तरूण दल अध्यक्ष विद्वान गुरूङले हालै र नेपाल दलित संघका अध्यक्ष लोकबहादुर विश्वकर्माले सोमबार राजीनामा दिएका थिए।
कांग्रेसले तदर्थ समिति गठन गरिएका भ्रातृ संघहरूलाई २०८१ चैत्र मसान्तभित्र महाधिवेशन गर्नैपर्ने समय दिएको थियो।
साथै २०८२ असार १६ देखि २३ गतेसम्म बसेको केन्द्रीय कार्यसमितिको बैठकले सो अवधिभित्र कार्यतालिका प्रस्तुत गरेका संघहरूको हकमा कार्यतालिकामा तोकिएको समयसम्म महाधिवेशन गर्ने गरी समयावधि थप गर्ने निर्णय गरेको थियो।
सहजीकरण गर्न पार्टीले निश्चित कार्यादेशसहित निर्देशक समिति बनाएको थियो तर तरूण दल, नेविसंघ, महिला संघ, दलित संघ, खेलकुद संघलगायत भ्रातृ संघले कार्यतालिकामा तोकिएको समयमा महाधिवेशन गरेका थिएनन्।
त्यसैले अधिवेशन गर्न सक्ने आधारसमेत नदेखिएकोले म्याद थपिरहनु आवश्यक नरहेको सोमबारको केन्द्रीय कार्यसम्पादन समिति बैठकको निर्णय छ
‘नेपाल तरूण दलका केन्द्रीय अध्यक्ष विद्धान गुरुङ र नेपाल दलित संघका अध्यक्ष लोकबहादुर विश्वकर्माले राजीनामा समेत दिइसकेको हुँदा तत् तत् भ्रातृ संघका केन्द्रीय समितिहरू स्वत: विघटन भएका छन्,’ कांग्रेसले भनेको छ, ‘म्याद सकिएका समितिले त्यस अवधिमा गरेका निर्णय र मनोनयनहरू पनि स्वत: अबैद्य भएका छन्। अत: नेपाली कांग्रेसको विधानको धारा ४२(१) बमोजिम अधिवेशन नभएका सबै भ्रातृ संघहरूको महाधिवेशन गर्न आवश्यक व्यवस्था गर्न केन्द्रीय कार्यसमितिका सभापतिलाई जिम्मेवारी प्रदान गर्ने निर्णय भएको छ।’
नेपाल थारू संघको हकमा २०८३ जेठ १६ र १७ गते महाधिवेशन गर्न तय भइसकेकोले सो अवधिसम्म समयावधि थप गरिएको पनि कांग्रेसले जनाएको छ।
-1746009348.jpg)
