नेपाली कांग्रेसका उपसभापति विश्वप्रकाश शर्माले ६ सदस्यीय संवैधानिक परिषदमा ३ जनाको बहुमत हुन नसक्ने बताएका छन्।
सरकारले हालै अध्यादेश ल्याएर ३ जनाको बहुमतबाट संवैधानिक परिषदमा निर्णय गर्न सक्ने व्यवस्था गरेको थियो।
तर शर्माले गण्डकी प्रदेशको नजिर देखाउँदै ३ जनाले बहुमत नहुने बताएका हुन्।
‘प्रधानमन्त्रीलाई एउटा नजिर- १४ जेठ ०८१ मा सर्वोच्चले ६० सदस्यीय गण्डकी प्रदेशसभामा बहुमत हुन ३१ सदस्य अनिवार्यहुने व्याख्या गर्यो l अर्थात् बहुमत हुन बहुसंख्यानै हुनुपर्छ l अर्थात् ६ सदस्यीय संवैधानिक परिषदमा बहुमत ३ जनाको हुनसक्दैन,’ शर्माले आज सामाजिक सञ्जाल एक्समार्फत् धारणा सार्वजनिक गरेका छन्।
उनले सर्वोच्चको व्याख्या सबैले मान्नुपर्ने पनि बताए।
‘संविधानको धारा १२८(४) भन्छ- सर्वोच्चको व्याख्या सबैले पालना गर्नुपर्छl अर्थात बहुमत हुन बहुसंख्या हुनैपर्छ l उत्तर कोरियामा बाहेक विश्वव्यापी लोकतान्त्रिक मान्यता स्पष्ट रुपमा यहि नै हो,’ शर्माले भने, ‘शब्दमा भन्ने- `विगतका गल्ती सच्याउने´ l अनि कर्ममा उत्तर कोरिया पछ्याउने? सम्बन्धित दलका जिम्मेवार मित्रहरूले गम्भीर मनन गरुँन्, ८० वर्षे न्यायीक इतिहासमा पञ्चायतले समेत नगरेको कर्मको धब्बा बोक्ने नै हो?’
प्रधानमन्त्रीको आह्वानमा आज अपराह्न ५ बजे संवैधानिक परिषद बैठक पनि बस्दैछ। यो बैठकको एजेन्डा प्रधान न्यायाधीश नियुक्ति सिफारिस गर्नेछ। संवैधानिक परिषदमा प्रमुख प्रतिपक्षी दल नेताको हैसियतमा नेपाली कांग्रेसका भीष्मराज आङ्देम्बे पनि सदस्य छन्।
-1746009348.jpg)
