नेपाली कांग्रेसका प्रवक्ता देवराज चालिसेले पार्टी संगठनलाई प्रविधिमैत्री बनाउनुपर्ने बताएका छन्।
पार्टीले सञ्चालन गरेको जरा अभियानअन्तर्गत क्रियाशील सदस्यता नयाँ अभिलेखीकरण तथा नवीकरण कार्यक्रमलाई कास्कीमा सुरू गर्दै उनले भने, ‘पार्टीलाई प्रविधिमैत्री वनाउँदै सवै कार्यपद्धतीलाई डिजिटलाइज्ड गर्न आवश्यक छ। समयको गतिसँगै पार्टीको कार्यशैली र पद्धतिमा व्यापक सुधार गर्नुपर्छ।’
यस अभियानको सिलसिलामा पार्टीका प्रवक्ता चालिसेले आफ्नो गृह जिल्ला कास्कीको पोखरा महानगरपालिका वडा नं ८ मा पुगेर आफ्नो क्रियाशील सदस्यता नवीकरण गरेका छन्।
सदस्यता नवीकरण कार्यक्रमको औपचारिक सुरूवात गर्दै प्रवक्ता चालिसेले पार्टी संगठनलाई प्रविधिमैत्री बनाउने बताएका हुन्।
परम्परागत तरिकाले सञ्चालन हुँदै आएको पार्टी प्रक्रियालाई अब डिजिटल युग अनुसार रूपान्तरण गर्नुपर्ने उनको भनाइ छ।
सदस्यता व्यवस्थापन, अभिलेखीकरण, आन्तरिक सञ्चार र निर्णय प्रक्रियालाई डिजिटल बनाउन सके पार्टी थप चुस्त, पारदर्शी र प्रभावकारी हुने उनको भनाइ छ।
‘पार्टीको यो अभियान सुधारको अभियान हो, यो अभियान पार्टीको जीवनसँग जोडिएको छ, यसमा राजनीतिक विवाद गरिरहनु पर्ने कुनै आवश्यकता छैन,’ उनले भने।
नेपाली कांग्रेसले हाल देशव्यापी रूपमा सञ्चालन गरिरहेको ‘जरा अभियान’को मुख्य लक्ष्य पार्टीको आधारभूत तहलाई बलियो बनाउनु रहेको उनले बताए।
यस अभियानअन्तर्गत पुराना सदस्यहरूको अद्यावधिक अभिलेखीकरण, नयाँ क्रियाशील सदस्यता वितरण र पार्टीको डिजिटल पूर्वाधार विकासलाई प्राथमिकता दिइएको उनको भनाइ छ। यसले आगामी महाधिवेशन तथा स्थानीय तह निर्वाचनलाई लक्षित गर्दै पार्टी संगठनलाई सुदृढ बनाउने रणनीति रहेको उनले बताए।
-1746009348.jpg)
