नेपाली कांग्रेसका सभापति गगन थापाले पार्टीको विशेष महाधिवेशनमा भाग नलिएका पक्षलाई केन्द्रीय कार्यसमितिमा समेटेका छन्।
गत पुसमा विशेष महाधिवेशन हुँदा तत्कालीन सभापति शेरबहादुर देउवा, नेता शेखर कोइराला र शशांक कोइरालालगायत सहभागी थिएनन्।
देउवा र कोइराला पक्षका नेताहरूलाई आज सभापति थापाले केन्द्रीय सदस्य मनोनीत गरेका हुन्।
पुसमा भएको विशेष महाधिवेशनबाट १३३ जना केन्द्रीय सदस्य सर्वसम्मत चयन भएका थिए। आज १९ जना मनोनीत गरेर अब केन्द्रीय कार्यसमिति सदस्य संख्या १५२ सदस्यीय बनाइएको छ, अझै सभापति थापाले केही केन्द्रीय सदस्यहरू मनोनीत गर्न पाउँछन्।
सभापति थापाले नेता पूर्णबहादुर खड्का र शेखर कोइरालासँग भेटवार्ता गरेको केही दिनपछि उनीहरू निकट नेताहरूलाई केन्द्रीय सदस्य मनोनीत गरेका हुन्।
एक पदाधिकारीले सेतोपाटीलाई दिएको जानकारीअनुसार केन्द्रीय सदस्य मनोनीत गर्दा सबैभन्दा धेरै ठाउँ निवर्तमान सभापति देउवा पक्षलाई दिइएको छ। देउवा पक्षका ११ जना नेता केन्द्रीय सदस्य मनोनीत भएका हुन्।
साथै नेता शेखर पक्षका ७ जना र नेता शशांक पक्षका १ जना केन्द्रीय सदस्य मनोनीत भएको उनको भनाइ छ।
निवर्तमान सहमहामन्त्री महेन्द्र यादव र जीवन परियारलाई पनि सभापति थापाले केन्द्रीय सदस्य मनोनीत गरेका छन्।
यी हुन् मनोनीत भएका केन्द्रीय सदस्य-
१. महेन्द्र यादव — धनुषा
२. जीवन परियार — कास्की
३. उमेश श्रेष्ठ — चितवन
४. रमेश रिजाल — पर्सा
५. सुजाता कोइराला — मोरङ
६. दिलेन्द्रप्रसाद बडू — दार्चुला
७. चन्द्रकान्त भण्डारी — गुल्मी
८. अजयकुमार चौरसिया — पर्सा
९. लक्ष्मी परियार — उदयपुर
१०. आङ्गेलु शेर्पा — सोलुखुम्बु
११. दिनेशकुमार यादव — सप्तरी
१२. राजीव कोइराला — सुनसरी
१३. राजीव ढुंगाना — सुनसरी
१४. प्रा.डा. गोविन्दराज पोखरेल — प्यूठान
१५. सुशीला मिश्र भट्ट — कैलाली
१६. नागिना यादव — महोत्तरी
१७. दिनेश कोइराला — चितवन
१८. डा. जीवन राना — कैलाली
१९. श्री सीता थपलिया (उर्मिला) — धादिङ
