नेपाली कांग्रेसका सभापति गगन थापाले माध्यमिक शिक्षा परीक्षा (एसइई) को रिजल्ट छिटो गर्न सफल भएकोमा सरकारलाई धन्यवाद दिएका छन्।
यसपालि एक महिनामै एसइईको परीक्षाफल प्रकाशित भएको थियो। जबकि विगतका वर्षहरूमा ३ महिना लाग्ने गरेको थियो।
एसइईको परीक्षाफल सोमबार प्रकाशित भएको थियो।
‘हिजो सार्वजनिक भएको एसइई परीक्षामा सफल हुनुभएका सम्पूर्ण विद्यार्थी भाइबहिनीहरूलाई हार्दिक बधाई। तपाईंहरूको मेहनत र लगनशीलताले आज सार्थक रूप पाएको छ। त्यस्तै अपेक्षित ग्रेड प्राप्त गर्न नसक्नुभएका भाइबहिनीहरूलाई यो नतिजालाई केवल एउटा खुड्किलोको रूपमा लिन र कत्ति पनि विचलित नहुन आग्रह गर्दछु। आगामी ग्रेड वृद्धि परीक्षा आफ्नो क्षमता प्रमाणित गर्ने अर्को सुन्दर अवसर हो,’ उनले सामाजिक सञ्जाल फेसबुकमा लेखेका छन्।
विद्यार्थीको मनोबल उच्च राख्न र आवश्यक शैक्षिक परामर्श दिन उनले स्थानीय सरकारहरूलाई तत्काल समन्वयका लागि अनुरोध पनि गरेका छन्।
‘यस वर्ष एसइईको नतिजा अपेक्षाकृत छिटो सार्वजनिक गर्न सफल भएकोमा नेपाल सरकार, सम्बन्धित निकाय र संलग्न सबैप्रति धन्यवाद तथा बधाई व्यक्त गर्दछु,’ उनले भने।
