नेपाली कांग्रेसको संस्थापन इतर पक्षले मंगलबार विराटनगरमा कोशी प्रदेशस्तरीय भेला आयोजना गरिरहँदा नेता कृष्णप्रसाद सिटौला मुख्य वक्ताका रूपमा उपस्थित थिए।
कोशी प्रदेशको पार्टी संगठनमा 'होल्ड' भएको नेता भएकाले पूर्णबहादुर खड्का सहितका नेतासँगको सल्लाहमा कोशीमा सिटौलालाई पठाउने तय भएको थियो।
दोलखाका नेता कुन्दनराज काफ्लेसहित विराटनगर आइपुगेका नेता सिटौलाको कार्यक्रममा उनकै निकट सहयोगी भनेर चिनिएका नेताहरू नै अनुपस्थित रहे। बरू शेखर कोइराला पक्षका कोशीका पूर्वमुख्यमन्त्री केदार कार्की उपस्थित हुँदा सिटौला टिमकै धेरै नेता कार्यक्रममा गयल रहे।
देउवा पक्ष र आफू पक्षीय धेरै नेता नै अनुपस्थित रहेको थोरै सहभागीमाझ नेता सिटौलाले गगन थापा नेतृत्वको समितिसँग जुधेर अघि बढ्ने घोषणा गरेका थिए।
'हामी अहिले पूर्णबहादुर खड्काको नेतृत्वमा अघि बढेका छौं, बढिरहन्छौं,' भेलामा सिटौलाले भनेका थिए, 'अहिले पार्टी क्रियाशील सदस्यता अद्यावधिक गर्ने जुन काम भइरहेको छ, त्यो कसैले नगर्नुहोला। अरू साथीहरूलाई पनि रोक्नुहोला।'
पत्रकारहरूलाई प्रवेश निषेध गरिएको भेलामा भित्र यसो भनेर बाहिर निस्केपछि सिटौलाले 'पार्टीलाई एकताबद्ध राख्ने उपायको खोजी गर्न छलफल भएको' प्रतिक्रिया दिएका थिए।
छोटो तयारीमा कार्यक्रम भएकाले सहभागी धेरै नभएको भन्दै सिटौलाले जेठ १० मा अर्को प्रदेश भेला राख्न निर्देशन दिएका थिए।
'आज छोटो तयारीमा कार्यक्रम भएकाले धेरै सहभागी हुन पाइएन, अब जेठ १० मा योभन्दा ठूलो भेला गर्ने गरी अघि बढ्नुहोला,' सिटौलाको भनाइ उद्धृत गर्दै भेलामा सहभागी एक नेताले भने, 'यसको संयोजन भूपेन्द्रजी (राई) ले गर्नुहोला।'
कांग्रेस केन्द्रीय समितिले पार्टी सदस्यता अद्यावधिक गर्ने अभियानलाई उच्च प्राथमिकता दिइरहेका बेला सिटौलाले भने विराटनगर आएर अद्यावधिक नगर्न भनेका हुन्।
आफै खिन्न हुने गरी थोरै सहभागी देखेपछि सिटौलाले अर्को कार्यक्रम गर्न भनेको नेताहरूले बताएका छन्। उनी आउने मंगलबारको कार्यक्रममा सहभागी बन्न भन्दै कोशी प्रदेश सरकारका पर्यटन, वन तथा वातावरण मन्त्री रहेका भीम पराजुली र पार्टीका प्रदेश महामन्त्री भूपेन्द्र राईले अगुवाइ गरेका थिए।
तर उनीहरूले बोलाएको कार्यक्रममा पहिले सिटौला पक्षका भनेर चिनिएकै नेताहरू पनि आएनन्।
'हामीलाई महामन्त्रीजीले फोन गरेर कृष्ण दाइ आउने कार्यक्रममा आउनुस् भन्नुभएको थियो,' कोशी प्रदेशसभाका एक कांग्रेस सांसदले भने, 'तर प्रदेश सभापतिज्यूले नजानु भन्नुभएकाले गइएन।'
कोशीका प्रदेश सभापति उद्धव थापा प्रदेश संसदीय दलका नेतासमेत हुन्। झापाकै नेता थापा केही अघिसम्म सिटौलाका सबभन्दा विश्वासपात्र थिए। यद्यपि विशेष महाधिवेशनपछि थापा सिटौलाबाट टाढिएका छन्।
उनी कांग्रेस केन्द्रीय बैठकमा लगातार सहभागी भइरहेका छन्। झापाकै सिटौला निकट नेता सुधीर शिवाकोटी पनि विशेष महाधिवेशनदेखि उनको साथ छाडेर गगन थापातिर लागिसकेका छन्। केही समयअघि सिटौला गृहजिल्ला झापा पुग्दा थापा र शिवाकोटीलाई उनले भेट्न बोलाएका थिए। तर दुवै नेताले सिटौला भेट्न अस्वीकार गरेका थिए।
'तपाईंको टिमको खास नेता भनेर चिनिने प्रदेश सभापतिसहितका नेताहरू नै आज अनुपस्थित रहनुभयो नि?' भन्ने सेतोपाटीको प्रश्नमा नेता सिटौलाले 'सभापतिको श्रीमती बिरामी भएर आउन नपाएको' जबाफ दिए।
तर कांग्रेस नेताहरूका अनुसार पार्टीको आधिकारिक लाइनभन्दा बाहिर जान नसक्ने भन्दै थापाले गुट भेलामा जान नसकिने बताएका थिए।
आलोपालो प्रणाली अनुसार एमालेसँग कोशीमा सत्ता सहयात्रामा रहेको कांग्रेसबाट थापा मुख्यमन्त्री बन्ने दाउमा छन्। यस्तो बेला गुटगत अभ्यासमा लाग्दा अवसर फुत्किन सक्ने थापा निकट नेताहरूको भनाइ छ।
सिटौलाको कार्यक्रममा अनुपस्थित रहने उनी निकट अर्का नेता कोशी संसदीय दलका प्रमुख सचेतक गोपाल तामाङ पनि एक हुन्। सिटौला निकट प्रदेश सांसदहरू, झापाका सभापति देउमान थेवेसहितका नेताहरू पनि कार्यक्रममा अनुपस्थित रहे।
कार्यक्रममा सिटौलासहित नेताहरू मीन विश्वकर्मा, कोशी प्रदेशका पूर्वमुख्यमन्त्री केदार कार्की, कोशीका मन्त्री भीम पराजुली, पूर्व केन्द्रीय सदस्य लक्ष्मी खतिवडा, सीता खतिवडाका साथै सुनिता गच्छदार, सुनिता गुरूङ, भोला राजवंशी लगायत सहभागी थिए।
पार्टीको विशेष महाधिवेशनबाट निर्वाचित नेतृत्वलाई अस्वीकार गर्दै आएका सिटौलालाई कांग्रेसले राष्ट्रियसभा दलको नेताबाट हटाएको थियो। आफूलाई हटाउने निर्णयलाई उनले मूर्खतापूर्ण भनेका छन्।
'यो निर्णयकर्ताहरूको मुर्खतापूर्ण निर्णय हो, अरू केही भन्नु छैन,' उनले प्रतिक्रिया दिए।
सिटौलालाई शेरबहादुर देउवा संसदीय दल नेता हुँदा राष्ट्रियसभा दल नेता मनोनीत गरिएको थियो। भीष्मराज आङ्देम्बे संसदीय दल नेता भएपछि सिटौलालाई दल नेताबाट हटाएर राष्ट्रियसभा सांसद कमला पन्तलाई दल नेता मनोनीत गरिएको छ।
नेता सिटौलाले केन्द्रीय सदस्य मनोनीत गर्ने कार्यले पार्टी एकतामा बल नपुग्ने पनि बताए।
सभापति गगन थापाले सोमबार १९ जना नेताहरूलाई केन्द्रीय सदस्य मनोनीत गरेका थिए। गत पुसको विशेष महाधिवेशनमा सहभागी नरहेका देउवा र नेता शेखर कोइराला पक्षका १९ जनालाई सभापति थापाले केन्द्रीय सदस्य मनोनीत गरेका थिए।
