प्रमुख प्रतिपक्ष दल नेपाली कांग्रेसले सरकारको नीति तथा कार्यक्रमबारे जबाफ दिन पनि प्रधानमन्त्री बालेन्द्र शाह उपस्थित नभए संसद बैठक बहिष्कार गर्ने चेतावनी दिएको छ।
प्रधानमन्त्रीको अनुपस्थितिमा अर्थमन्त्री स्वर्णिम वाग्लेले सरकारको नीति तथा कार्यक्रम छलफल गरियोस् भन्ने प्रस्ताव पेस गर्न हुने तर त्यसको जबाफ प्रधानमन्त्री शाह आफैले दिनुपर्ने धारणा कांग्रेस नेता अर्जुननरसिंह केसीले राखे।
उनले प्रधानमन्त्री शाहले संसदलाई उपेक्षा गरेको विषयमा भने आपत्ति जनाए।
नेता केसीले प्रधानमन्त्रीको अनुपस्थितिमा कुनै पनि विषय संसदमा टेबुल गर्न कुनै पनि मन्त्रीले गर्न सक्ने व्यवस्थामा नियमावलीमा भएकाले त्यसलाई रोक्न आवश्यक नभएको बताए।
उनले भने, ‘प्रधानमन्त्रीले संसदीय परम्परा र मान्यताहरूको एकपछि अर्को उपेक्षा गर्नुभएको भन्ने आम रूपबाट हाम्रो धारणा हो। खास गरेर अहिले हामीहरू जो उभिरहेका छौँ। हामी सोही धारणाबाट अभिप्रेरित भएर उभिएका हौँ। जब प्रधानमन्त्रीजीको उपस्थितिको माग गरिएको छ। अहिलेसम्मको संसदीय परम्पराको कुरा म यतातिरका साथीहरूलाई पनि आकर्षित गर्न चाहन्छु कि कुनैपनि कार्यक्रममा प्रधानमन्त्रीको अनुपस्थितिमा प्रधानमन्त्रीले तोकेको कुनै पनि मन्त्रीले प्रधानमन्त्रीले टेबुल गर्ने कुरा गर्नु हाम्रो परम्परा हो। र सभामुखले भन्न खोज्ने भएको धारा ३८ को व्याख्या पनि त्यही हो। त्यसैले मैले सभामुखज्यूमार्फत माननीयज्यूहरूलाई मैले के अनुरोध गर्न चाहन्छु भने प्रधानमन्त्रीबाट संसदको उपेक्षा भयो भन्ने साथीहरू हुनुहुन्छ। अहिले प्रस्तुत मात्रै गर्ने कुरामा माननीय मन्त्रीजीले प्रस्तुत गर्दा हामीलाई कुनै आपत्ति छैन। तर जबाफ दिने बेलामा पनि प्रधानमन्त्रीको अनुपस्थिति भयो भने हामी बाध्य भएर संसद बहिष्कार गर्छौं।’
सांसद केसीले प्रधानमन्त्री शाहको अनुपस्थितिमा कुनै पनि विषय मन्त्रीहरूले संसदमा टेबुल गर्ने कुरा संसदीय परम्परा पनि भएकाले त्यसलाई अवरोध गर्न नमिल्ने पनि स्मरण गराए। –न्युज एजेन्सी नेपाल
