लोकतान्त्रिक समाजवादी पार्टी (लोसपा) का सांसद महन्थ ठाकुरले प्रधानमन्त्री बालेन शाहको 'कपालमा उपियाँ परेको हुनसक्ने' भन्दै व्यंग्य गरेका छन्।
सरकारको नीति तथा कार्यक्रममाथि छलफल क्रममा बिहीबार ठाकुरले प्रधानमन्त्री शाहको हाउभाउलाई लिएर यस्तो व्यंग्य गरेका हुन्।
प्रधानमन्त्री शाह मंगलबार राष्ट्रियसभामा नीति तथा कार्यक्रम टेबल गर्न आएका थिए। त्यसै सन्दर्भमा ठाकुरले कपाल कन्याएको अभिनय गर्दै भने, 'अस्ति प्रधानमन्त्रीज्यू आउनुभयो। टोपी लगाउनुभएको थिएन, जहिले पनि ...।'
यति भनेर उनले कपाल कन्याएको अभिनय गरे।
उनले प्रधानमन्त्रीको कपालमा उपियाँ परेको हुनसक्ने भन्दै एउटा उदाहरण पनि दिए।
'केही वर्ष अघिसम्म काठमाडौं उपत्यकाका घरहरूमा झ्याल र ढोका होचा हुने भएकाले पलङ र फर्निचर राख्न कठिन हुन्थ्यो। अनि बोरामा भुस भरेर त्यसमा डसना राखिन्थ्यो,' ठाकुरले भने, 'केही दिनपछि त्यसमा एक अजिa किसिमको उपियाँ निस्कन्थ्यो।'
ठाकुरले थपे, 'अस्ति त्यही उपियाँ थियो कि। खट् खटाउनुभयो। टोपी लगाएको भए देखिन्थ्यो। उपियाँ जस्तो देखिन्छ। नहोला!'
उनले सरकारले मुलुकको आर्थिक अवस्था सुधार्न स्वदेशी पुँजी, विदेशी पुँजी र प्रवासी पुँजी लगाउने भने पनि व्यापारीहरू जेलमा राख्ने कार्य भएकोमा विरोध जनाए। साथै कतिपय देश छाडेर हिँडेको उल्लेख पनि गरे।
जेनजी आन्दोलनको मुख्य विषय कुशासन र भ्रष्टाचारको अन्त्य भए पनि सरकारले सुकुम्बासी बस्तीमा डोजर चलाएकोमा प्रश्न गरे।
'त्यसलाई सुशासन भन्ने,' ठाकुरले प्रश्न गरे, 'सम्पत्ति शुद्धीकरण (आयोग) आइसकेको छ। त्यसले कसलाई शुद्ध गर्छ?'
