सुकुम्बासी बस्तीमा डोजर चलेपछि विस्थापित भई कीर्तिपुरस्थित राधास्वामी सत्सङ होल्डिङ सेन्टरमा बसिरहेकामध्ये १४ बालबालिकालाई काठमाडौं महानगरपालिकाले होस्टेल पठाएको छ।
शुक्रबार महानगरपालिकाका कार्यवाहक प्रमुख सुनिता डंगोलको अध्यक्षतामा बसेको बैठकले महानगर, विद्यालय र सुकुम्बासीका अभिभावकबीच सम्झौता गरी १४ बालबालिकालाई होस्टेल पठाएको हो।
उनीहरूलाई कक्षा १० सम्म आवासीय सुविधासहित निःशुल्क पढ्ने व्यवस्था मिलाइएको महानगरले जनाएको छ।
कीर्तिपुर होल्डिङ सेन्टरमा ६१ जना बालबालिका छन्।
शिक्षा विभागका अनुसार नाम दर्ता गरेका केही बालबालिका अभिभावकसँग बाहिर भाडाको घरमा बस्न गएका छन्।
सम्झौतामा महानगरपालिकाका तर्फबाट शिक्षा अधिकारी नमराज ढकाल, विद्यालयका तर्फबाट प्रधानाध्यापक र विद्यार्थीका तर्फबाट अभिभावकले हस्ताक्षर गरेको महानगरले जनाएको छ।
सम्झौतापछि विद्यालयका अधिकारीहरुले विद्यार्थी र अभिभावकसँग परामर्श गर्नुभएको थियो। विद्यार्थीहरुको निःशुल्क आवासीय अध्ययनका विषयमा बैठकले विभिन्न ४ प्रस्तावमा निर्णय गरेको छ। विद्यार्थीहरु आउँदो आइतबारदेखि विद्यालय जानेछन्।
सम्झौता अवसरमा महानगरपालिकाका कार्यवाहक प्रमुख सुनिता डंगोलले, पढ्न पाउने बालबालिकाहरुको नैसर्गिक अधिकार सुरक्षित गर्ने दायित्वमा आफूहरुले अविचलित रुपमा काम गरिरहेको बताइन्।
महानगरका अनुसार प्याब्सन अन्तर्गतका १० वटा विद्यालयसँग सम्झौता गरिएको छ।
प्याब्सनका जिल्ला अध्यक्ष नवराज भट्टका अनुसार मनमैजुको एन्जल हर्ट स्कूल, पेप्सीकोलाको गेटवे एकेडेमी, कपनको भ्याली पब्लिक स्कूल, पेप्सीकोलाकै नेक्सस इन्टरनेशनल स्कूल, शंखमुलको इनोभेटिभ स्कुल, कालोपुलको हेम्स स्कूल कालोपुल, शंखमुलको केएमसी, नागार्जुनको केभिसी, जोरपाटीको भेनस पब्लिक स्कूल र चाबाहिलको सुप्रिम इन्टरनेशनल स्कूलमा उनीहरूलाई पढ्ने व्यवस्था गरिएको छ।
एनप्याब्सन अन्तर्गतका ३ वटा विद्यालयसँग सम्झौता भएको छ।
एनप्याब्सन महानगर समिति अध्यक्ष नवराज पाण्डेका अनुसार प्रोग्रेसिभ सेकेण्डरी स्कूल चावहिल, नेरिक एकेडेमी, बानेश्वर बुद्धनगर र नेशनल आइडल बोर्डिङ स्कुल मन्डिखाटारसँग सम्झौता भएको हो।
अभिभावक मनोज महतोले आफ्ना बालबालिकाले राम्रो विद्यालयमा पढ्न पाउने भएपछि खुशी लागेको बताए।
तर सँगै बसिरहेका छोरा छोरीलाई होस्टल पठाउनुपर्दा दुःखी भएको अर्की अभिभावक गीता लामाले बताइन्।
'मेरो नातिलाई छुट्टै सुताएको थिइनँ। अब अलग्गै सुत्ने भयो। यसमा दुःख लागेको छ। तर, राम्रो ठाउँमा पढ्न पाउने भो, यसमा हौसला भएको छ,' उनले भनिन्।
-1778915934.jpg)
यस्तो छ सम्झौतामा उल्लिखित बुँदा—
१. विद्यार्थीको अध्ययन निरन्तरताका लागि काठमाडौँ महानगरपालिकाले अभिभावकीय भूमिका निर्वाह गर्नेछ। विद्यार्थीका लागि आवश्यक पर्ने विद्यालयले तोकेको पोशाक, झोला, स्तेशनरी तथा अन्य शैक्षिक सामग्री उपलब्ध गराउनेछ।
२. विद्यालयले आवास सुविधासहित निःशुल्क पठनपाठनको व्यवस्था मिलाउनेछ। विद्यार्थीहरुलाई अन्य विद्यार्थी सरह सुविधा उपलब्ध गराउनेछ। व्यवहार गर्नेछ। अभिभावकसँग भेट गराउनेछ। महानगरपालिका र अभिभावकहरुसँग समन्वय गर्ने, सहजीकरण गर्ने तथा शैक्षिक सूचना प्रदान गर्नेछ।
३. अभिभावकहरुले समय समयमा विद्यालयमा उपस्थित भएर विद्यार्थीको शैक्षिक प्रगतिका विषयमा जानकारी लिनुपर्नेछ। लामो समय विद्यालय छुट्टी भएमा विद्यार्थीहरुलाई जिम्मा लिएर परिवारसँग बस्ने प्रबन्ध मिलाउनु पर्नेछ। विद्यालयले तोकेको अवधिका विद्यालय लैजानु पर्नेछ। काठमाडौँ महानगरपालिका र विद्यालय प्रशासनसँग नियमित सम्पर्कमा रहनु पर्नेछ।
-1778915934.jpg)
