नेपाली कांग्रेसका पूर्वकार्यवहाक सभापति पूर्णबहादुर खड्काले गगन थापा सिंगो पार्टीको सभापति बन्न नसकेको बताएका छन्।
नेपाली कांग्रेस कर्णाली प्रदेश कार्यसमितिले शनिबार वीरेन्द्रनगरमा गरेको ‘नेपाली कांग्रेस बृहत्तर एकता र भावी कार्यदिशा’ विषयक विचार गोष्ठीमा बोल्दै खड्काले थापा सानेपाको मात्रै सभापति रहेको बताएका हुन्।
उनले तत्कालीन समयमा गिरिजाप्रसाद कोइरालाका कारणले पार्टी फुटेको र उनकै कारणले पार्टी एकीकरण भएको बताउँदै अहिले पनि पार्टी फुटाउने वा जुटाउने सम्पूर्ण हात सभापति थापासँग रहेको बताए।
केही दिनअघि सभापति र उपसभापतिहरूसँगको छलफलमा पनि आफूले त्यो कुरा भनेको खड्काले बताए।
'विभाजनको डिलमा छ। त्यो बाटोमा जान हुन्न भनेको छु। पार्टी मिलाउने कि फुटाउने तपाईहरुको जिम्मामा छ भनेको छु,’ उनले भने।
उनले अदालतले जिताएपछि आफूहरुले पनि सभापति मानेको बताउँदै सिंगो कांग्रेसको सभापति बन्नुपर्ने बताए।
विशेष महाधिवेशनकै कारण कांग्रेस चुनावमा खुम्चिएको बताए।
‘विशेष महाधिवेशनको कारणले कांग्रेस ३८ सिटमा खुम्चियो, रास्वपा दुई तिहाई नजिक पुग्यो, उनले भने, ‘त्यो नभएको भए देशको परिस्थिति अर्कै हुन्थ्यो।’
