नेकपा एमालेका उपाध्यक्ष विष्णु पौडेलले मदन भण्डारीले अघि सारेको जनताको बहुदलीय जनवादलाई ठीक ढंगले आत्मसात गर्न नसक्दा पार्टी यो अवस्थामा पुगेको हो भनेर स्वीकार्न ढिला भइसकेको बताएका छन्।
मदन आश्रित स्मृति दिवसका सन्दर्भमा आइतबार सामाजिक सञ्जाल फेसबुकमार्फत राष्ट्रिय राजनीति र पार्टीको आन्तरिक जीवनमा जबजबाट ठिक ढंगले निर्देशित हुन सक्यौं वा सकेनौं भनेर वस्तुनिष्ट समीक्षा गर्न विलम्ब भइसकेको पनि बताएका छन्।
‘यतिबेला नेपाली कम्युनिष्ट आन्दोलन इतिहासकै सबैभन्दा ज्यादा अप्ठ्यारो मोड र रक्षात्मक अवस्थामा आइपुगेको छ। हामीले राष्ट्रिय राजनीति र पार्टीको आन्तरिक जीवनमा जनताको बहुदलीय जनवादबाट ठिक ढंगले निर्देशित हुन सक्यौं वा सकेनौं भनेर वस्तुनिष्ट समीक्षा गर्न विलम्ब भैसकेको छ। जनताको वहुदलीय जनवादलाई ठिक ढंगले आत्मसात गर्न र सही ढंगले प्रयोग गर्न नसक्दा यो अवस्था सिर्जना भएको हो भन्ने सच्चाइलाई स्वीकार्नु ढिलो भैसकेको छ,’ उनले भनेका छन्।
यसर्थ आफ्ना तर्फबाट भएका भुल–त्रुटि र गल्ती–कमाजोरीहरू स्वीकार गर्दै जनता समक्ष आत्मालोचक भएर प्रस्तुत हुनुपर्ने उनले बताएका छन्।
‘जनताको बहुदलीय जनवादको मर्मलाई ठिक ढंगले आत्मसात गर्दै गुमेको जनताको विश्वास पुनः प्राप्त गर्न र नेकपा एमालेलाई राष्ट्रिय राजनीतिको निर्णायक शक्तिको भूमिकामा पुनःस्थापित गर्न दृढ संकल्प गरौं, यही नै मदन–आश्रितप्रति सच्चा श्रद्धाञ्जलि हुनेछ,’ उनले भनेका छन्।
आज ३३ औं मदन–आश्रित स्मृति दिवस हो।
तत्कालीन महासचिव भण्डारी र संगठन विभाग प्रमुख आश्रितको २०५० साल जेठ ३ गते दासढुंगा दुर्घटनामा मृत्यु भएको थियो। एमालेले त्यसलाई हत्या भन्दै आएको छ। विगतमा विभिन्न आयोग बनेर छानबिन, अध्ययन, अनुसन्धान भए पनि सत्यतथ्य बाहिर आएको छैन। र, रहस्यमय रूपमै रहेको छ।
