नेपाली कांग्रेसले ३० वर्षमुनि उमेर भएकालाई आवेदन दिनेबित्तिकै क्रियाशील सदस्यता दिने सुरू गरेको छ।
सदस्यता व्यवस्थापन समितिका अनुसार ३० वर्ष उमेर मुनिकालाई सिधै क्रियाशील सदस्यता दिन सुरू गरिएको हो।
सदस्यता व्यवस्थापन समिति संयोजकसमेत रहेका महामन्त्री प्रदीप पौडेलले युवाहरूलाई सिधै क्रियाशील सदस्यता दिन सुरू गरेको बताए।
‘३० वर्षमुनिका युवाहरूलाई आवेदन दिनेबित्तिकै क्रियाशील सदस्यता दिन सुरू गरेका छौं, पार्टीमा युवाहरूलाई उचित अवसर र ठाउँ दिन पनि यो आवश्यक छ,’ उनले सेतोपाटीसँग भने।
कांग्रेसले प्राय: साधारण सदस्यता लिएको वर्षदिन पुगेपछि क्रियाशील सदस्यता दिने गरेको छ। तर अब युवाहरूलाई केन्द्रित गरेर सिधै क्रियाशील सदस्यता दिन सुरू गरिएको हो।
कांग्रेसले वैशाखदेखि नै जरा अभियानअन्तर्गत पार्टी संगठन सुदृढीकरणका काम गरिरहेको छ।
महामन्त्री पौडेल संयोजक रहेको सदस्यता व्यवस्थापन समितिले पनि प्रदेशहरूमा पुगेर जरा अभियानसँगै क्रियाशील अद्यावधिक अभियान पनि साथसाथै अघि बढाइरहेको छ।
क्रियाशील सदस्यहरूको विवरणलाई डिजिटल गर्न अद्यावधिक गर्न लागिएको महामन्त्री पौडेलले बताए।
‘पार्टीको सदस्यता व्यवस्थापन केन्द्रीय समितिले यो डिजिटल अभियानलाई थप प्रभावकारी बनाउन प्रदेशस्तरीय भेला तथा प्रशिक्षणको आयोजना गरिरहेको छ,’ पौडेलले भने, ‘हरेक प्रदेशका पार्टीका विभिन्न तहका सभापति तथा प्राविधिकहरुलाई डिजिटल अद्यावधिकको अपरिहार्यता एवं प्राविधिक प्रक्रियाबारे प्रशिक्षण जारी छ।’
उनकाअनुसार कर्णाली, लुम्बिनी, बागमती र कोशी प्रदेशमा प्रशिक्षण सकिएको छ।
कोशीको भेडेटारमा सदस्यता व्यवस्थापन समितिका केन्द्रीय संयोजक पौडेलकै उपस्थितिमा प्रशिक्षण र अन्तर्क्रिया शनिबार भएको थियो।
महामन्त्री पौडेलका अनुसार जेठ २१ गतेभित्र नयाँ क्रियाशील वितरण, छुटेका पुराना सदस्यहरूको नवीकरण र सम्पूर्ण क्रियाशील सदस्यता अद्यावधिक गरिसक्नुपर्नेछ।
यो विवरण अद्यावधिकपछि कांग्रेस आफ्ना सदस्यहरूको डिजिटल डाटाबेस भएको व्यवस्थित र पूर्ण रूपमा डिजिटल स्वरूपमा रूपान्तरित भएको पार्टी बन्ने उनले बताए।
नेता पूर्णबहादुर खड्का र शेखर कोइराला पक्षले भने क्रियाशील अद्यावधिकमा प्रश्न उठाउँदै आएका छन्। १५ औं महाधिवेशनका लागि भनेर यसअघि नै ६ लाख क्रियाशील नवीकरण र ३ लाख नयाँ वितरण गरिएकोले अद्यावधिकको आवश्यकता नरहने उनीहरूको तर्क छ।
तर संस्थापन पक्षले भने करिब ९ लाख क्रियाशील रहेको कांग्रेसमा ८० हजार सदस्यको मात्रै मोबाइल नम्बरलगायत विवरण रहेको भन्दै सदस्यको आवश्यक विवरण संकलनका लागि पनि अद्यावधिकको आवश्यकता रहेको बताउने गरेको छ।
