सत्तारूढ राष्ट्रिय स्वतन्त्र पार्टी (रास्वपा) का सांसद उज्ज्वल कुमार झा अहिले सामाजिक सञ्जालमा चर्चामा छन्।
चर्चाको कारण उनको कपाल काट्ने स्टाइल हो।
उनले दायाँबायाँ दुवैतर्फ अत्यन्तै छोटो कपाल काटेका छन् भने पछाडिपट्टि लामो कपाल बाटेका छन्। यही शैलीको कपाल पालेर प्रतिनिधिसभा बैठकमा भाग लिँदै आएका उज्ज्वलको फेसनलाई लिएर सामाजिक सञ्जालमा टीकाटिप्पणी भइरहेको छ।
उनको हेयरस्टाइल सांसद पदको गरिमासँग मेल नखाएको टिप्पणी पनि कतिपयले गरेका छन्।
प्रतिनिधिसभा नियमावलीले सांसदहरूले लगाउने पोसाक सभामुखले तोके बमोजिम हुने व्यवस्था गरेको छ। सांसदहरूले पोसाक लगाउँदा औपचारिक, मौलिक संस्कृति र परम्परा वा पहिचान झल्किने मर्यादित वेशभूषा हुनुपर्ने नियमावलीमा भनिएको छ। तर कपाल काट्ने तौरतरिकाबारे नियमावली मौन छ।
हामीले रास्वपा सांसद झासँग उनको हेयरस्टाइल र त्यसमाथि भइरहेका टीकाटिप्पणीबारे कुरा गरेका छौं।
सेतोपाटीसँगको कुराकानीमा झाले आफ्नो हेयरस्टाइललाई धार्मिक र आधुनिक शैलीको मिश्रणका रूपमा व्याख्या गरेका छन्। उनले कपाल कसरी काट्ने भन्ने कुरा व्यक्तिगत स्वतन्त्रताको विषय भएको बताए।
'मेरो कपाल धार्मिक र आधुनिकीकरण मिश्रित छ,' झाले भने, 'नेपालमा लामो आन्दोलनपछि स्वतन्त्रता र पहिचानको विषय स्थापित भयो। तर अझै पनि समाजले मानिसको आवरण र पहिरन हेरेर 'जजमेन्ट' (निर्णय) गर्ने गरेको छ।'
आफ्नो अनुभव र अध्ययनका आधारमा नभएर कपालका कारण गरिएको 'जजमेन्ट' चित्त बुझेको उनले बताएका छन्।
कपालमाथि गरिएको टीकाटिप्पणीलाई उनी 'परम्परागत सोचको उपज' भन्छन्।
यस्तो हेयरस्टाइल संसदको गरिमासँग मेल खान्छ कि खाँदैन भन्ने विषयमा झाको प्रतिक्रिया छ, 'कसैले मेरो लुगा वा कपाललाई लिएर आलोचना गर्छ भने त्यसमा मेरो आपत्ति छैन। आफ्नो मर्यादाभित्र रहेसम्म कसैलाई स्पष्टीकरण दिइरहनुपर्छ भन्ने आवश्यकता म देख्दिनँ।'
महोत्तरी-३ बाट निर्वाचिन झा सांसद पदको सपथ लिन गेरू रङको धोती र गम्छा अनि सेतो कुर्ता लगाएर पुगेका थिए। उनले सांसद पदको सपथ मैथिली भाषामा लिएका थिए।
उनी प्रधानमन्त्री बालेन शाहको पुर्ख्यौली गाउँ एकडरा गाउँपालिकाका बासिन्दा हुन्।
२०७९ सालमा उनले प्रदेशसभा निर्वाचनमा स्वतन्त्र उम्मेदवारी दिएका थिए। पाँच दलको गठबन्धनविरूद्ध उम्मेदवारी दिएका झाले त्यति बेला ५ हजार ४ सय मत ल्याएका थिए। विजयी रीनाकुमारी तिवारीले ६ हजार ४ सय मत ल्याएकी थिइन्।
यसपालि प्रतिनिधिसभा निर्वाचनमा उनी ३२ हजार ४५१ मत ल्याएर विजयी भए। दोस्रो स्थानमा रहेका नेपाल संघीय समाजवादी पार्टीका मोहम्मद रिजवानले ५ हजार ९६९ मत ल्याएका थिए।
झाले भारतको कर्नाटकास्थित 'विश्वेसराया टेक्नोलोजिकल विश्वविद्यालय' बाट सिभिल इन्जिनियरिङमा स्नातक गरेका छन्।
सांसद झाको पारिवारिक पृष्ठभूभि राजनीतिक छ। उनका हजुरबुबा कुलान्द झा पञ्चायत कालमै स्थानीय रूपमा चर्चित नेता थिए। उनी स्थानीय झैझगडा मिलाउने र न्याय दिने व्यक्तिका रूपमा परिचित थिए। स्थानीयले कुलानन्द नभए उनको 'बेतको लौरो राखेर भए पनि पञ्चायतमा झगडा मिलाउने गरिएको' घटना सुनाएका छन्।
राजनीतिक पारिवारिक विरासत भएका झा आफू सेवाका लागि राजनीतिमा आएको बताउँछन्।
'कमाइका लागि त एउटा किराना पसल खोल्दा हुन्छ,' झाले एक अन्तर्वार्तामा भनेका थिए, 'अर्को व्यक्तिको मुहारमा खुसी देख्ने इच्छा छ भने राजनीति गर्नुपर्छ।'
उनले शिक्षा, स्वास्थ्यसँगै किसानका लागि मल, बीउ र बजार व्यवस्थापन गर्ने बताउँदै आएका छन्।
तर अहिले उनी आफ्नो कामभन्दा कपालका कारण चर्चामा छन्। कतिपयले उनको पछाडिपट्टि बाटिएको कपाललाई हिन्दु संस्कार अनुसार पालिएको 'टुपी' का रूपमा व्याख्या गरेका छन् भने कतिपयले अगाडि दायाँबायाँ काटेर बीचमा बाँकी राखिएको कपाललाई 'जुल्फी' भनेका छन्।
हेयरस्टाइलका जानकारहरू यसलाई 'अन्डरकट भायकिङ हेयरकट' भन्छन्।
