नेकपा एमाले अध्यक्ष केपी शर्मा ओलीले पार्टी पुनर्गठनको बहस चलाउनेहरूलाई कारबाही गर्ने चेतावनी दिएका छन्।
सोमबार बसेको सचिवालय बैठकमा बोल्ने क्रममा अध्यक्ष ओलीले पार्टी र नेतृत्वमाथि संकट आइपरेका बेला झन् अप्ठ्यारो पर्ने गरी पुनर्गठनको बहस गर्न थालेको भन्दै उनीहरू सबैलाई अनुशासनको कारबाही गर्ने चेतावनी दिएको एक पदाधिकारीले बताए।
'अध्यक्षले सोमबारको बैठकमा झन्डै एक घन्टा बोल्नुभयो। पार्टी पुनर्गठनको बहस चलाउने नेता–कार्यकर्ताहरूप्रति उहाँले आक्रोश पोख्नुभयो,' ती नेताले भने, 'पार्टी, नेतृत्व संकटमा परेका बेला, आन्दोलन कमजोर बनाउन खोजिएका बेला पुनर्गठन गर्नुपर्छ भन्दै बहस चलाउनु अराजकता भएको भन्दै कारबाही गर्ने उहाँको आसय थियो।'
बैठकमा बोल्ने क्रममा अध्यक्ष ओलीले सचिवालय तहका कुनै नेताको नाम लिएनन्। तर उनको आक्रोश पार्टी उपाध्यक्ष विष्णु पौडेल, उपमहासचिव योगेश भट्टराई, नेता सुरेन्द्र पाण्डेतर्फ लक्षित रहेको सचिवालय तहकै नेता बताउँछन्।
फागुन २१ को प्रतिनिधिसभा निर्वाचनमा पार्टीले अनपेक्षित पराजय व्यहोरेको भन्दै संस्थापन पक्षकै नेताहरूले ओलीले विकल्प दिनुपर्ने बताउँदै आएका छन्। पार्टी उपाध्यक्ष विष्णु पौडेल, पृथ्वी सुब्बा गुरूङ लगायत नेताहरू पार्टी पुनर्गठनको पक्षमा छन्।
महासचिव शंकर पोखरेलले समेत पछिल्लो समय नेतृत्वको विकल्प खोज्न थालेपछि ओली क्रूद्ध बनेका हुन्।
पुनर्गठनको आवाज उठाउनेप्रति ओली कठोर सुनिँदै गएपछि उपमहासचिव भट्टराईले 'अब तपाईंले के जित्नुपर्ने छ?' भन्दै प्रतिवाद गरेको अर्का एक सदस्यले बताए।
भट्टराईका अतिरिक्त बैठकमा बोल्ने अरू सदस्यले पनि प्रतिवाद गरेका थिए।
'पुनर्गठनमा लाग्नेलाई कारबाही गर्ने विषय उहाँले राख्नुभएको थियो। त्यसको जमेर प्रतिवाद भएको छ। आगामी बैठकमा अझ चर्को प्रतिवाद हुनेछ। उहाँ परिस्थितिको ठिक मूल्यांकन गर्ने, कमी-कमजोरी महसुस गर्ने, आत्मालोचित हुने र अवरूद्ध आन्दोलनलाई निकास दिने पक्षमा हुनुहुन्न। यसबारे आगामी बैठकमा छलफल हुन्छ,' ती नेताले भने।
एमाले सचिवालय बैठक आगामी शुक्रबार बस्नेछ। बैठकमा ११ वटा कार्यसूची तय गरिएको छ। सोमबार बसेको बैठकले पूर्वराष्ट्रपति विद्यादेवी भण्डारीको पार्टी सदस्यता नवीकरण गर्ने निर्णय गरेको थियो। अर्को बैठकले केन्द्रीय कमिटी बैठक बोलाउने नेताहरूले बताएका छन्।
