तार्केश्वर नगरपालिकाले वडा नम्बर ३ तीनपिप्ले क्षेत्रमा बिहीबार डोजर चलाएको छ। सार्वजनिक जग्गा अतिक्रमण गरी अवैध रूपले बनाइएका टहरा, पर्खाल तथा अन्य संरचना भत्काउन डोजर चलाएको नगरपालिकाका मेयर कृष्णहरि महर्जनले बताएका छन्।
सर्वोच्च अदालतले वैशाख २५ गते सुकुम्बासी बस्ती नभत्काउन अन्तरिम आदेश जारी गर्दा गर्दै किन डोजर चलाइयो भन्ने प्रश्नमा मेयर महर्जनले भने, 'नगरपालिका क्षेत्रमा अतिक्रमण गरेर बनाइएका संरचना भत्काउन थालेको एक महिना भइसक्यो। अदालतले सुकुम्बासी बस्ती नभत्काउन भनेको हो, अतिक्रमित क्षेत्र नहटाउन भनेको होइन।'
उनले अगाडि थपे, 'तार्केश्वर सुकुम्बासी शून्य हो, हामीले अतिक्रमित क्षेत्र मात्र हटाएका हौं।'
उनले स्थानीय सरकार सञ्चालन ऐन अनुसार नै अतिक्रमण गरेर बनाइएका संरचना भत्काउने प्रक्रिया अघि बढाइएको जानकारी दिए।
उनका अनुसार तीनपिप्ले क्षेत्रमा वरपर घरजग्गा भएका बासिन्दाले नै सार्वजनिक जग्गामा पसल र टहरा बनाएको पाइएकाले उनीहरूलाई पत्राचार गरी सूचना दिएर भत्काउन थालिएको बताए।
'काठमाडौं महानगरपालिकाले थापाथलीको बस्ती भत्काउनुभन्दा पहिलेदेखि नै यहाँ सुरू गरिएको हो,' उनले भने, 'हामीले तार्केश्वर नगरपालिका-८ लामाबगरबाट अतिक्रमित क्षेत्र हटाउन थालेका हौं।'
स्थानीयले सार्वजनिक जग्गा अतिक्रमण गरेर टहरा बनाई भाडामा लगाएको पनि उनले बताए।
'घरबार विहीन र कतै जग्गा नभएका व्यक्तिहरू यहाँ टहरा बनाएर बसेका होइनन्। पैसा कमाउन टहरा बनाइएको हो,' उनले भने, 'त्यसैले अदालतको आदेश यहाँ लागू हुँदैन।'
-1779344845.jpg)
