अमेरिकी राष्ट्रपति डोनाल्ड ट्रम्पले परम्परा तोड्दै ताइवानका राष्ट्रपति लाइ चिङ-तेसँग कुराकानी गर्ने बताएका छन्।
सन् १९७९ सम्म अमेरिकाले ताइवानलाई आधिकारिक चीनको कूटनीतिक मान्यता दिएको थियो।
सो वर्ष कम्युनिस्ट चीनलाई मान्यता दिएयता अमेरिकी र ताइवानी राष्ट्रपतिहरूबीच प्रत्यक्ष कुराकानी भएको छैन।
सन् २०१६ को अन्त्यमा पहिलो पटक राष्ट्रपति निर्वाचित भएपछि पदभार ग्रहण नगर्दै उनले तत्कालीन ताइवानी राष्ट्रपति त्साई इङ-वेनसँग कुरा गरेर दशकौंदेखिको कूटनीतिक मर्यादा तोडेका थिए।
त्यसबेलाको फोन कुराकानीपछि चीनले तुरून्तै अमेरिकी सरकारसमक्ष औपचारिक रूपमा विरोध दर्ता गराएको थियो।
अहिले भने चीन भ्रमण गरेको एक हप्ता नबित्दै राष्ट्रपतिकै रूपमा उनले ताइवानी राष्ट्रपतिलाई भेट्ने बताएका हुन्।
'म उनीसँग कुरा गर्नेछु। म सबैसँग कुरा गर्छु... हामी त्यसमा, अर्थात् ताइवान समस्यामा काम गर्नेछौं,' ट्रम्पले बुधबार टिप्पणी गरे।
यसले चीनसँगको अमेरिकी सम्बन्धलाई बिगार्न सक्छ भनेर द गार्डियनले लेखेको छ।
ताइवानलाई चीनले आफ्नो अभिन्न भाग मान्छ। चीनले शान्तिपूर्ण रूपमा सो टापुलाई आफ्नो नियन्त्रणमा लिन नसके बल प्रयोग गर्ने विकल्प कहिल्यै त्यागेको छैन। चिनियाँ सैन्य कारबाहीलाई रोक्नका लागि ताइवानलाई लामो समयदेखि सैन्य सहयोग दिने र हतियार बेच्ने गर्दै आएको छ।
चिनियाँ राष्ट्रपति सी चिनफिङले ताइवान मामिलाको व्यवस्थापन नमिले द्वन्द्व हुन सक्ने भन्दै चीन भ्रमणका बेला ट्रम्पलाई चेतावनी समेत दिएका थिए।
'ताइवानको मुद्दा चीन-अमेरिका सम्बन्धको सबैभन्दा महत्त्वपूर्ण मुद्दा हो। यदि यसलाई गलत तरिकाले व्यवस्थापन गरियो भने दुई राष्ट्रहरूबीच टक्कर वा संघर्ष हुन सक्छ। जसले समग्र चीन-अमेरिका सम्बन्धलाई अत्यन्तै खतरनाक स्थितिमा धकेल्नेछ,' सीको टिप्पणी उद्धृत गर्दै चीनको सरकारी समाचार एजेन्सी सिन्ह्वाले जनाएको थियो।
तर चीनबाट अमेरिका फर्केको एक हप्ता नबित्दै ट्रम्पले ताइवानका राष्ट्रपतिसँग कुरा गर्ने बताएका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
