सीमा विवाद मिलाउन भन्दै कर्णाली प्रदेशका मुख्यमन्त्री यामलाल कँडेलले प्रधानमन्त्री बालेन शाहलाई पत्र लेखेका छन्।
कर्णालीका मुख्यमन्त्री कँडेलले हुम्ला र बाजुराको सीमा क्षेत्रमा देखिएको विवाद मिलाउन पहल गरिदिन भन्दै आज प्रधानमन्त्रीलाई पत्र लेखेको उनको सचिवालयले जानकारी दिएको छ।
‘विगत केही दिनदेखि उत्पन्न सीमा विवादका कारण नागरिकबीच द्वन्द्व बढेको र शान्ति सुरक्षामा बाधा भई जनजीवन प्रभावित भएकोले विवाद समाधानका लागि पहल गरिदिन’ उनले प्रधानमन्त्रीलाई आग्रह गरेका हुन्।
मुख्यमन्त्री कँडेलले प्रधानमन्त्री शाहलाई लेखेको पत्रमा दुई जिल्लाको सीमा विवादबाट थप क्षति हुन नदिन आवश्यक सजकता अपनाउनुपर्ने पनि उल्लेख छ।
सीमा विवाद समाधान गर्न संघीय सरकारले आवश्यक तत्काल पहल गर्नुपर्ने मुख्यमन्त्री कँडेलको भनाइ छ।
साथै सीमा क्षेत्रमा भएको विवादका कारण कर्णाली करिडोरमा २४ घन्टादेखि यातायात बन्द छ।
बाजुरामा प्रहरीको चौकी स्थापना हुन लागेपछि त्यसको विरोधमा हुम्लाका स्थानीयले बाजुराका स्थानीयलाई आक्रमण गरेका थिए।
स्थानीयले घटनामा संलग्नलाई पक्राउ गरेर कारबाही गर्न माग गर्दै स्थानीयले बिहीबारदेखि बाजुराको धलाचौर र कुवारीमा सडक बन्द गरेका हुन्। अहिलेसम्म पनि सडक खुलेको छैन।
सडक खुलाउन धुलाचौरमा वार्ता जारी छ।
आक्रमणबाट बाजुराको हिमाली गाउँपालिकाका प्रमुख प्रशासकीय अधिकृत कुलबहादुर थापा, हिमाली–३ का वडा सदस्यसमेत रहेका लाम्पाटाका ३४ वर्षीय पेमा गारा गुरूङ, उनकी श्रीमती ३३ वर्षीया लक्ष्मी गुरूङ, सोही ठाउँका २४ वर्षीय मिनु कुँवर र प्रहरी चौकी विच्छिया बाजुराका प्रहरी सहायक हवल्दार महेश धामीसहित पाँच जना घाइते भएका थिए।
घटनाको दोस्रो दिन चार जना घाइतेलाई हेलिकप्टर चार्टर गरि कर्णाली प्रदेश अस्पताल सुर्खेत लगिएको थियो। त्यसपछि उनीहरूलाई बाँके र काठमाडौं लगिएको थियो।
बाजुराका प्रहरी प्रवक्ता प्रहरी निरीक्षक नरेशबहादुर शाहीका अनुसार काठमाडौंस्थित ट्रमा सेन्टरमा उपचाररतमध्ये तीन जना शुक्रबार डिस्चार्ज भइसकेका छन्। घाइते २४ वर्षीय मिनु कुँवरको भने ट्रामा सेन्टरमा उपचार जारी छ।
प्रहरी निरीक्षक लक्ष्मीराज जोशीले धुलाचौरमा उत्पन्न समस्या समाधानका लागि अहिले पनि सर्वपक्षीय वार्ता जारी रहेको बताए। जारी वार्तामा ‘हिमाली युवा क्लव’, जिल्लामा उपलब्ध राजनीतिक दलहरू, हिमाली गाउँपालिकाका अध्यक्ष गोविन्दबहादुर मल्ल, उपाध्यक्ष राजकला सार्की लगायत सहभागी छन्।
वार्ता स्थल बाहिर आक्रमणकारीलाई कारबाही हुनुपर्ने मागसहित नाराबाजी पनि चलेको छ।
बाजुराका प्रमुख जिल्ला अधिकारी डोरेन्द्र निरौलाले अवरुद्ध सडक खुलाउन वार्ता भइरहेको बताए।
‘सर्वपक्षीय वार्ताका सहभागीहरूले सडक अवरुद्ध गरी लामो समयसम्म सर्वसाधारण जनतालाई दुःख पीडा दिनु हुन्न भन्नेमा सहमत हुनु भएको छ,’ उनले भने ‘तर आक्रमण तथा कुटपिटमा संलग्नलाई कारबाही हुनु पर्छ, प्रहरी चौकी स्थापना हुनुपर्छ भन्ने उहाँको माग छ।’
जिल्ला प्रहरी प्रवक्ता नरेशबहादुर शाहीले कसैका विरुद्ध उजुरी नआएका कारण हालसम्म कसैलाई पनि प्रहरीले पक्राउ नगरेको बताए।
प्रजिअ निरौलाले पनि प्रहरीमा हालसम्म कुटपिटमा संलग्नबारे जाहेरी नआएको बताए।
‘लाम्पाटाबाट लखेटिएका, कुटपिटमा परेकाका आफन्तले त्यो आक्रमणमा संलग्नलाई तत्काल पक्राउ गर्नु पर्छ भन्दै सडक अवरुद्ध गर्नु भएको छ,’ उनले भने ‘तर, जाहेरी आएको छैन। घाइतेमध्ये तीन जना आजै डिस्चार्ज भएको हुँदा उहाँहरू आएर जाहेरी दिएमा कारबाही प्रक्रिया अघि बढ्छ।’
हुम्लाका प्रहरी प्रमुख डिएसपी शंकर खड्काले भने बाजुरामा भएको सडक अवरोधका कारण सवारी साधन संचालनमा बाधा उत्पन्न भ एपनि आफ्ना जिल्लामा अन्य कुनै समस्या नरहेको बताए।
‘विवाद उतैको हो र वार्ता तथा छलफल पनि उतै भइरहेको भन्ने छ,’ उनले भने, ‘हालसम्म घटनाबारे हुम्लामा उजुरी परेको छैन। कोही पक्राउ पनि परेका छैनन्।’
