सर्वोच्च अदालतले दुर्गा प्रसाईंलाई हिरासतमा राख्न थपिएको म्यादभित्र मुद्दा चल्ने/नचल्ने निर्णय गर्न आदेश दिएको छ।
शुक्रबार न्यायाधीशहरू विनोद शर्मा र नित्यानन्द पाण्डेयको इजलासले दुर्गा प्रसाईंमाथि थप म्याद थपेर हिरासतमा नराख्न आदेश दिएको हो।
मुद्दा चल्ने/नचल्ने निर्णय गर्न र नभएमा थुनाबाट छाडेर जेजे गर्नुपर्ने हो गर्न भनेर आदेश दिएको हो।
उनको तर्फबाट दायर भएको बन्दी प्रत्यक्षीकरणको रिट भने खारेज भएको छ।
‘... वस्तुनिष्ठ आधार कारण समेत लिखित जबाफसमेतबाट विद्यमान नदेखिएको स्थितिमा उनलाई थप अवधि थुनामा नै राखी मुद्दा पुर्पक्ष गर्नुपर्नेसम्मको मानसिब अवस्था नदेखिँदा दोस्रोपटक म्याद थप भएको अवधिभित्र अनुसन्धान तहकिकात सम्पन्न भई मुद्दा चल्ने/नचल्ने निर्णय भएमा सोही बमोजिम र सो बमोजिम हुन नसकेमा थुनाबाट छोडी जेजे गर्नुपर्ने गर्नु गराउनु,’ सर्वोच्चले भनेको छ।
प्रहरीले जेठ ४ गते प्रसाईंलाई पक्राउ गरेको थियो। उनलाई जेठ ५ गते तीन दिनका लागि म्याद थप भएको थियो।
दोस्रो पटक जेठ ७ गते चार दिनका लागि म्याद थप भएको हो। यो समय सकिनुपूर्व नै उनीबारे निर्णय गर्नुपर्ने भएको हो।
पर्सा प्रहरीले उनलाई विद्युतीय कारोबार ऐन र राज्यविरूद्धको कसुरअनुसार अनुसन्धान गर्न पक्राउ गरेको थियो।
