नेकपा एमालेका सचिव महेश बस्नेतले अध्यक्ष केपी शर्मा ओलीलाई अध्यक्षबाट हटाइँदैछ भनेर बाहिर चलाइएका हल्ला सचिवालय बैठकले गलत सावित गरेको बताएका छन्।
चार दिनसम्म चलेको सचिवालय बैठकको समापनपछि प्रतिक्रिया दिँदै उनले अध्यक्ष ओलीको सबै प्रस्ताव सचिवालय बैठकले पारित गरेको दाबी गरे।
‘बाहिर जुन किसिमले मिडियाबाजी भए, अध्यक्षज्यूलाई बिदा गरिँदैछ, राजीनामा मागिँदैछ, अध्यक्षको पक्षमा सचिवालयमा संख्या कमजोर छ भन्ने खालका भ्रामक प्रचार जे गरिए, ती सबै गलत छन् भनेर हामीले हिजोदेखि भन्दै आएका थियौं। आज बैठकमा अध्यक्षज्यूले जे जे प्रस्ताव गर्नुभयो, त्यही नै पारित भयो,’ सचिव बस्नेतले जानकारी दिए।
आइतबार झण्डै १० घण्टा बैठक चलेको थियो।
बैठकले संविधान सुझाव, निर्वाचन समीक्षा कार्यदल गठन गर्यो। त्यस्तै महासचिव शंकर पोखरेलले पदाधिकारीहरूसँग छलफल गरेर कार्यविभाजन प्रस्ताव तयार पार्ने र अध्यक्ष ओलीले अन्तिम रूप दिने निर्णय भएको उपमहासचिव लेखराज भट्टले जानकारी दिए।
