तोकिएको समयभित्र महाधिवेशन नगरेपछि स्वत: विघटित नेपाली कांग्रेसका ५ मध्ये २ भ्रातृ संस्थाको नेतृत्व चयन भएको छ।
नेपाल महिला संघ र नेपाल तरूण दलको नेतृत्व मात्रै चयन भएको हो, कार्यसमिति वा सदस्यहरू छैन।
नेविसंघ, दलित संघ र लोकतान्त्रिक खेलकुद संघको नेतृत्व चयन हुन बाँकी रहेको कांग्रेसका नेताहरू बताउँछन्।
कांग्रेसले लामो समयदेखि अधिकांश भ्रातृ संस्थाको अधिवेशन गर्न सकेको छैन। शेरबहादुर देउवा दुई कार्यकाल सभापति हुँदा पनि यी भ्रातृ संस्था तदर्थ समितिमै चलेका थिए।
महाधिवेशन गर्न भन्दै तदर्थ समिति गठन गरे पनि दिइएको समयमा महाधिवेशन नगरेपछि समय थप गर्दै तदर्थ समितिलाई निरन्तरता दिँदै आएको अवस्था थियो।
तर कांग्रेसले गत वैशाखमा ५ भ्रातृ संस्था विघटन गर्यो। विघटनमा पर्नुअघि तरूण दल अध्यक्ष विद्वान गुरूङले मात्र पदबाट राजीनामा बुझाएका थिए। गुरूङलाई देउवाले तदर्थ समिति अध्यक्ष मनोनीत गरेका थिए।
अहिले सभापति गगन थापाले महिला संघ अध्यक्षमा चितवनकी मीना खरेल र तरूण दल अध्यक्षमा काठमाडौंका मनिष कोइरालालाई नियुक्त गरेका छन्। बाँकी ३ भ्रातृ संस्थाको नेतृत्व मनोनीत गर्न बाँकी छ।
सभापति थापाका अनुसार जेठ १५ गतेभित्र यी भ्रातृ संस्थाको नेतृत्व चयन भइसक्छ। महाधिवेशन गर्ने कार्ययोजना नै दिएर भ्रातृ संस्थाका नेतृत्व चयन गरिएको छ।
तर संस्थापनइतर पक्षका विद्यार्थीहरूले महाधिवेशन सुनिश्चित गर्न माग गरिरहेका छन्। तदर्थ समिति बनाउने विगतकै अभ्यासलाई सभापति थापाले पनि निरन्तरता दिएकोमा उनीहरूको विरोध छ।
