नेकपा एमालेका प्रमुख सचेतक ऐन महरले प्रधानमन्त्री संसदमा आएर उठेका प्रश्नहरूको जबाफ दिनुपर्ने बताएका छन्।
प्रतिनिधि सभाको आजको बैठकमा बोल्दै उनले प्रधानमन्त्री संसदप्रति जबाफदेही नभएको बताए।
‘प्रधानमन्त्रीले यो सदनलाई किन यो ढंगबाट बेवास्ता गर्न खोजिरहनुभएको छ, खोपीको देउता बन्दै हुनुहुन्छ, म सत्तापक्ष सरकारलाई सोध्न चाहन्छु- प्रधानमन्त्री वालेन्द्र शाहलाई खोपीको देउता बनाउँदै घन्टी बजाएर पूजा गरेको हो? के बालेनतन्त्र स्थापना गर्न खोजिएको हो?,’ उनले प्रश्न गरे।
उनले जनमत सम्मान गर्न पनि प्रधानमन्त्री सदनमा उपस्थित हुनुपर्ने बताए।
‘संविधान, प्रतिनिधि सभा नियमावली कार्यान्वयन गर्न र जनतमत सम्मान गर्न पनि प्रधानमन्त्री यो सदनमा उपस्थित हुनुपर्छ, प्रधानमन्त्री उपस्थित नभएसम्म सदनको कारबाही अघि नबढाइयोस्। सभामुखले प्रधानमन्त्रीलाई रूलिङ गरेर यी प्रश्नको जबाफ दिने परिस्थिति निर्माण गरियोस्,’ उनले भने।
