आजको प्रतिनिधि सभा बैठक चलिरहेका बेला मर्यादापालकहरूले प्रमुख प्रतिपक्षी नेपाली कांग्रेसकी सांसद गीताकुमारी सेन्दाङलाई बाहिर निकालेको विषयमा सचेतक निश्कल राईले आपत्ति जनाएका छन्।
सभामुखको आदेशबेगर मर्यादापालकहरूले घेरेर सांसद सेन्दाङलाई बाहिर निकालेको निश्कलको भनाइ छ।
‘क्रमभंगताले सदनको गरिमा अझ बढाउँछ जस्तो लाग्थ्यो तर नहुँदो रहेछ। हाम्रो पार्टीकी सांसद गीताकुमारी सेन्दाङलाई फोटो खिचेको निहुँमा मर्यादापालकले बाहिर निकालेका छन्,’ सचेतक निश्कलले प्रतिनिधि सभा बैठकमै भने, ‘सभामुखले संसदमा सचेत गराउने हो। सचेत गराउँदा नमाने आदेश गर्ने हो। सभामुखको आदेशबेगर नै हाम्रो सांसदलाई ३ जना मर्यादापालकले घेरेर बाहिर निकालेका छन्। नियमावलीमा फोटो र भिडिओ खिच्न पाइँदैन भन्ने व्यवस्था छ। सभामुखको आदेशबेगर गरिएको गतिविधि सह्य हुँदैन। सभामुखले त्यस्तो आदेश कानेखुसी गरेर दिने होइन, सबैलाई जानकारी गराउनुपर्छ। कानेखुसीबाट संसद अघि बढ्दैन। यो सदनको गरिमा सभामुखले पनि राख्नुपर्छ।’
कांग्रेस सचेतक राईले यस विषयमा कुरा राखेपछि सभामुख डोलप्रसाद अर्यालले जबाफ दिएका थिए।
‘निश्कल राईले उठाएको विषयमा ध्यानाकर्षण भएको छ। सदन चलिरहेको बेला गीताकुमारी सेन्दाङले सभामुखतर्फ देखिने गरी मोबाइलबाट फोटो र भिडिओ खिच्ने प्रयास गर्नुभयो। त्यो सभा सञ्चालन मर्यदाविपरीत थियो। सभामुखले मर्यादापालकलाई फोटो, भिडियो खिचिएको छ कि छैन हेर्न निर्देशन दिएको हो। चेकजाँच गरिएको हो, बाहिर निकालिएको छैन। विषय तोडमोड नगर्न ध्यानाकर्षण गराउँछु।’
