नेकपा एमाले संसदीय दल उपनेता पद्मा अर्यालले जलवायु परिवर्तनका जोखिमपूर्ण संकेत देखिन थालेको भन्दै बेलैमा सम्बोधन गर्न सरकारको ध्यानाकर्षण गराएकी छन्।
बुधबार प्रतिनिधि सभा बैठकमा बोल्ने क्रममा सांसद अर्यालले जलवायु परिवर्तनको न्यूनीकरण एवं अनुकूलनका निम्ति राज्यले स्थानीय तहदेखि समुदायसम्म सामूहिक सहभागितामा आधारित विशेष अभियान/कार्यक्रम सञ्चालन गर्नुपर्ने बताएकी छन्।
‘नेपाल न्यून कार्बन उत्सर्जन गरेर पनि जलवायु परिवर्तनको उच्च जोखिमा रहेको छ। मौसमको चक्र बिग्रिएको छ, वर्षामा फेरबदल आएको छ। बर्सेनि गर्मीका ताता दिन झन्– झन् ताता हुँदै गएका छन्, हिउँदा चिसा रात झन्–झन् चिसा हुँदै गएका छन्। निकट ५ वर्षको अन्तरालमै हामीले मेलम्ची, मनाङ–मुस्ताङ, एवं लाङटाङको केरूङ क्षेत्रमा अप्रत्याशित बाढी पहिरो देख्यौं। हिउँ ताल फुट्नाले थामे गाउँमा निम्तिएको विध्वंश समेत यही समयको हो। यी सबै घटनाहरू जलवायु परिवर्तनको भयानक स्वरूपका संकेत हुन्,’ उनले भनिन्।
जलवायु परिवर्तनका यी संकेतलाई सम्बोधन गर्न आजका दिनमै पर्याप्त र उपयुक्त कदम चालिएन भने निकट भविष्यमा नै थुप्रै जनताले थात थलो छाडेर अन्यत्र बसाइँ सर्न बाध्य हुने प्रक्षेपण अध्ययनहरूले देखाएको पनि उनले बताइन्।
जलवायु परिवर्तन आजको समयमा एउटा प्रमुख मानवीय संकटका रूपमा देखा परेको पनि उनले बताएकी छन्।
‘यसरी जलवायु परिवर्तनको न्यूनीकरण एवं अनुकूलनका निम्ति राज्यले स्थानीय तहदेखि समुदायसम्म सामूहिक सहभागितामा आधारित विशेष अभियान/कार्यक्रम सञ्चालन गर्ने तर्फ यथाशीघ्र प्रभावकारी कदम चाल्न जरूरी रहेको छ। यस साझा समस्या निराकरणतर्फ सामूहिक पहलकदमी लिनका निम्ति सबै राजनितिक दल तथा सरोकारवाला व्यक्तिले स्वामित्व लिन सक्ने संयन्त्र गठन गर्ने तर्फ सभामुख महोदय मार्फत् नेपाल सरकारको ध्यानाकर्षण गराउन चाहन्छु,’ उनले भनिन्।
