सत्तारूढ राष्ट्रिय स्वतन्त्र पार्टी (रास्वपा) सांसद निशा डाँगीले काठमा परनिर्भरता बन्द गर्नुपर्ने बताएकी छन्।
प्रतिनिधि सभाको बुधबारको बैठकमा बोल्दै सांसद डाँगीले त्यसको सुरूवात निर्माणधीन संसद भवन र सिंहदरबारबाट गर्नुपर्ने बताएकी छन्।
'सरकारलाई आग्रह गर्छु। परनिर्भरता बन्द गर्नैपर्छ। सुरूवात यही संसद भवन र सिंहदरबारबाट गरौं,' उनले भनिन्, 'त्यसपछि देशभित्र नेपाली काठबाट बनेका फर्निचर मात्रै प्रयोग गर्ने नियम लागू गरौं।'
उनले निर्माणधीन संसद भवनको प्रतिनिधि सभा हलका कुर्सी बनाउन काठबारे पनि प्रश्न गरेकी छन्।
'हामी बस्ने कुर्सी कुन देशबाट ल्याइएको काठबाट बनेको हो? महालेखा परीक्षकको कार्यालयको ६१ औं वार्षिक प्रतिवेदनले नेपालको काठको सदुपयोग नहुँदा वार्षिक अर्बौं रूपैयाँको काठजन्य सामग्री आयात भएको जनाएको छ,' उनले भनिन्।
स्वदेशी काठ निकाल्न फाइल रोक्ने तर विदेशी काठ भित्र्याउन सजिलै एलसी खुलाइने नीतिबारे पनि उनले प्रश्न उठाइन्।
'यो कस्तो किसिमको नीति हो?,' उनले भनिन्, 'सबै वन फडानी गर्नुपर्छ भनेको होइन। तर हामीसँग भएको धनको सही सदुपयोग पक्कै पनि गर्नैपर्छ।'
