राष्ट्रिय स्वतन्त्र पार्टी (रास्वपा) की सांसद निशा डाँगीले सभामुख र सांसद बस्ने कुर्सी कुन देशको काठले बनेको हो भनेर प्रश्न गरेकी छन्।
बुधबार प्रतिनिधि सभा बैठकमा बोल्दै महालेखा परीक्षकको ६१ औँ वार्षिक प्रतिवेदनले काठको सदुपयोग नहुँदा अर्बौं रुपैयाँको काठजन्य सामग्री आयात भइरहेकोबारे उनले बताएकी हुन्।
‘२०७९ सालमा मैले सदनमा पहिलो सम्बोधनमा, तत्कालीन सभामुखलाई सोधेको थिएँ, सभामुखको कुर्सी कुन देशबाट ल्याइएको काठले बनेको हो भनेर। हामी छिट्टै नयाँ सदनको भवनमा जाँदैछौं, म फेरि पनि सोध्न चाहन्छु त्यो सदनमा सभामुख र सासंद बस्ने कुर्सी कुन देशको काठ आयात गरी बनाइएको छ? महालेखा परीक्षकको ६१ औं वार्षिक प्रतिवेदनले काठको सदुपयोग नहुँदा अर्बौं रुपैयाँको काठजन्य सामग्री आयात भइरहेको छ, आज स्वदेशी काठ निकाल्न प्रशासनिक फाइल रोकिने गरिन्छ तर विदेशी काठ भित्र्याउन सहजै एलसी खुल्ने गर्छ, यो कस्तो नीति हो?,’ उनले भनिन्।
आफूले नेपालको सबै बन फडानी गर्नुपर्छ भन्न नखोजेको तर सदुपयोग गर्न आवश्यक रहेको बताएकी हुन्।
‘त्यसैले म सभामुखमार्फत् सरकारलाई आग्रह गर्छु— यो परनिर्भरता बन्द गरौं। सुरूआत यही संसद भवन र सिंहदरबारबाट गरौं, देशभित्र शतप्रतिशत नेपाली काठ र फर्निचर मात्रै प्रयोग गर्ने नियम तत्काल लागू गरौं,’ उनले भनिन्।
